ຄະນະຜູ້ແທນ ກະຊວງ ກະສິກຳ ແລະປ່າໄມ້ ສປປ ລາວ ໄດ້ເດີນທາງໄປເຂົ້າຮ່ວມກອງປະຊຸມ ລັດຖະມົນ ຕີກະສິກຳ ແລະປ່າໄມ້ ອາຊຽນ-ອິນເດຍ     ຄັ້ງທີ 4 ຈັດຂື້ນໃນວັນທີ 12 ມັງກອນ 2018 ທີ່ນະຄອນຫລວງນິວເດລີ, ປະເທດອິນເດຍ, ໂດຍແມ່ນ ທ່ານ ປອ. ລຽນ ທິແກ້ວ ລັດຖະມົນຕີກະຊວງ ກະສິກຳ ແລະ ປ່າໄມ້ ເປັນຫົວໜ້າຄະນະ. ການຮ່ວມມືດ້ານກະສິກຳ ແລະ ປ່າໄມ້ ລະຫວ່າງ ອາຊຽນ ແລະ  ອິນເດຍ ແມ່ນໄດ້ຮັບຜົນສຳເລັດເປັນກ້າວໆ, ປະເທດສະມາຊິກ ອາຊຽນ ແລະ ອິນເດຍ ໄດ້ຜັດ ປ່ຽນກັນເປັນເຈົ້າພາບ ຈັດກອງປະຊຸມເຊັ່ນ: ກອງປະຊຸມຄັ້ງທີ 1 ຈັດໃນວັນທີ 8 ຕຸລາ 2011 ທີ່ ນະຄອນຫລວງຈາກາກຕາ, ປະເທດອິນໂດເນເຊຍ; ຄັ້ງທີ 2 ຈັດໃນວັນທີ 17 ຕຸລາ 2012 ທີ່ ນະຄອນຫລວງນິວເດລີ, ປະເທດອິນເດຍ; ຄັ້ງທີ 3 ຈັດຂື້ນໃນວັນທີ 28 ກັນຍາ 2013 ທີ່ ນະຄອນຫລວງ ກົວລາລໍາເປີ, ປະເທດມາເລເຊຍ. ໃນໄລະຍະຜ່ານມາ ບັນດາທ່ານລັດຖະມົນຕີ ໄດ້ຮັບຮອງເອົາ ແຜນປະຕິບັດງານ ໄລຍະ 2011-2015 ຊຶ່ງແມ່ນຂອບການຮ່ວມມື ຂະແໜງການກະສິກຳ ແລະ ປ່າໄມ້ ລະຫວ່າງ ອາຊຽນ ແລະ ອິນເດຍ ໂດຍໄດ້ກຳນົດ 4 ໜ້າວຽກຕົ້ນຕໍ: 1) ຍົກສູງສະມັດຕະພາບການຜະລິດກະສິກຳ ເພື່ອຮັບປະກັນ ການຄໍ້າປະກັນສະບຽງອາຫານ, 2) ສົ່ງເສີມການແລກປ່ຽນຂໍ້ມູນຂ່າວສານ ແລະເຕັກໂນໂລຢີ, 3) ສົ່ງເສີມວຽກງານຄົ້ນຄວ້າ ແລະພັດທະນາ ສ້າງເປັນໂຄງການຮ່ວມມືຕ່າງໆ ແລະ 4) ຮັດແໜ້ນການຮ່ວມມື ດ້ານການສ້າງຄວາມອາດສາມາດ ໃຫ້ແກ່ບຸກຄະລາກອນ. ຜ່ານການ ຈັດຕັ້ງປະຕິບັດ ບັນດາກິດຈະກຳຕ່າງໆ ໃນຂອບວຽກທີ່ໄດ້ກຳນົດໄວ້ ໃນໄລຍະເວລາດັ່ງກ່າວນັ້ນ, ມາຮອດປັດຈຸບັນນີ້ ເຫັນວ່າ ມີໝາກຜົນສຳເລັດໃນຫລາຍດ້ານ, ຊຶ່ງປະເທດສະມາຊິກອາຊຽນ ແລະ ອິນເດຍ ໄດ້ຕີລາຄາສູງ ຕໍ່ຜົນສໍາເລັດເຫລົ່ານັ້ນ.

    ຈຸດປະສົງຕົ້ນຕໍ ຂອງກອງປະຊຸມ ລັດຖະມົນຕີ ກະສິກຳ ແລະ ປ່າໄມ້ ອາຊຽນ-ອິນເດຍ ຄັ້ງທີ 4 ນີ້ ແມ່ນ:         1) ເພື່ອພ້ອມກັນຕີລາຄາ ແລະຮັບຮອງເອົາ ບົດລາຍງານຜົນສຳເລັດ ຂອງການຈັດຕັ້ງປະຕິບັດ ແຜນປະຕິບັດງານ 2011-2015 ໃນໄລຍະຜ່ານມາ, ແລະ 2) ເພື່ອຄວາມເປັນເອກະພາບ ໃນການກຳນົດ ຂອບການຮ່ວມມື ແລະຮັບຮອງເອົາແຜນປະຕິບັດງານ 2016-2020 ຢ່າງເປັນທາງການ, ຊຶ່ງເນື້ອໃນຕົ້ນຕໍຂອງແຜນປະຕິບັດງານ 2016-2020 ແມ່ນສຶບຕໍ່ຜັນຂະຫຍາຍ 4 ໜ້າວຽກຕົ້ນຕໍ ທີ່ໄດ້ຈັດຕັ້ງປະຕິບັດ ໃນໄລຍະ 2011-2015 ຜ່ານມານັ້ນ ແລະ ກຳນົດເພີ່ມຕື່ມອີກ 4 ໜ້າວຽກໃໝ່ ແລະ ລວມທັງໝົດ ມີ 8​ໜ້າວຽກ. 4 ໜ້າວຽກເພີ່ມເຕີມເຂົ້າໃໝ່ ມີ: 1) ສະໜັບສະໜູນການຈັດຕັ້ງປະຕິບັດ ແຜນຍຸດທະສາດ ການເຊື່ອມໂຍງການຄໍ້າປະກັນດ້ານສະບຽງອາຫານ ອາຊຽນ, 2) ສົ່ງເສີມເຕັກ ນິກດ້ານຕ່າງໆ ເພື່ອຊ່ວຍໃຫ້ຊາວກະສິກອນ ມີຄວາມສາມາດ ປັບຕົວເຂົ້າໄດ້ກັບ ສະພາບການປ່ຽນແປງ ດ້ານດິນຟ້າອາກາດ, 3) ເອົາໃຈໃສ່ໃນການຄຸ້ມຄອງນຳໃຊ້ ຊັບພະຍາກອນທຳມະຊາດ ໃຫ້ມີຄວາມຍືນຍົງ ເຊັ່ນ: ທີ່ດິນກະສິກຳ, ແຫລ່ງນໍ້າ ແລະ ປ່າໄມ້, ແລະ 4) ສົ່ງເສີມການແລກປ່ຽນຢ້ຽມຢາມ ຊຶ່ງກັນແລະກັນ ໂດຍສະເພາະແມ່ນ ບັນດາຊາວກະສິກອນຜູ້ໜຸ່ມນ້ອຍ.

    ຄະນະຜູ້ແທນ ຂອງ ສປປ ລາວ ກໍໄດ້ສະແດງຄວາມຊົມເຊີຍ ຕໍ່ຜົນສຳເລັດ ຂອງການຮ່ວມມື ໃນຂະແໜງການກະສິກຳ ແລະປ່າໄມ້ ລະຫວ່າງ ອາຊຽນ ແລະ ອິນເດຍ ໃນຊຸມຜ່ານມາ ແລະ ໄດ້ສະແດງຄວາມເຫັນດີ ເປັນເອກະພາບ ແລະ ໃຫ້ການສະໜັບສະໜູນ ຕໍ່ກັບ ແຜນການຮ່ວມມື, ເພາະວ່າ ບັນດາຂອບວຽກເຫລົ່ານັ້ນ ກໍລ້ວນແລ້ວແຕ່ສອດ ຄ່ອງ ກັບແຜນຍຸດທະສາດ ການພັດທະນາ ຂະແໜງການກະສິກຳ, ປ່າໄມ້ ແລະ ພັດທະນາຊົນນະບົດ ຂອງ ສປປ ລາວ ພວກເຮົາ.

ຂ່າວ​ໂດຍ: ກົມ​ແຜນການ ​ແລະ ການ​ເງິນ

ກວດ​ແກ້​ໂດຍ: ທ່ານ ​ໄຊ​ປລາ​ເດດ ຈຸນ​ລະ​ມະນີ

      ໃນ​ວັນ​ທີ 22 ມັງກອນນີ້​, ທີ່​ໂຮງ​ແຮມ​ລາວ​ພຣາຊາ, ກົມ​ປູກຝັງ, ກະຊວງ ກະສິກໍາ ​ແລະ ປ່າ​ໄມ້ ​ໄດ້​ຈັດ​ກອງ​ປະຊຸ​ມຄັ້ງ​ທີ 22 ຂອງ​ໜ່ວຍ​ງານຊ່ຽວຊານດ້ານ​ການ​ເຊື່ອມ​ໂຍງ​ການ​ຄວບ​ຄຸມການ​ຕົກ​ຄ້າງສູງ​ສຸດ​ຂອງ​ຢາ​ປາບ​ສັດຕູ​ພືດອາຊຽນຂື້ນ, ​ໂດຍ​ການ​ເຂົ້າ​ຮ່ວມ​ຂອງ​ທ່ານ ວິ​ໄລ​ສຸກ ​ເຄນ​ນະ​ວົງ ຫົວໜ້າ​ກົມ​ປູກຝັງ ​ແລະ ທ່ານ ດຣ ຫງ່ານ ​ໄຈ​ກ໋ອງ ປະທານ​ຄະນະ​ຊ່ຽວຊານ​ສາ​ພິດ​ຕົກ​ຄ້າງ​ອາ​ຊຽນພ້ອມ​ດ້ວຍພະນັກ​ງານ​ວິຊາ​ການ​ ຈາກ​ບັນດາ​ສະມາຊິກ​ອາ​ຊຽນ​ເຂົ້າ​ຮ່ວມ50 ກວ່າ​ທ່ານ. ຈຸດປະສົງ​ຂອງ​ກອງ​ປະຊຸມ​ໃນ​ຄັ້ງ​ນີ້​ແມ່ນ​ເພື່ອ​ທົບ​ທວນຄືນ​ການຈັດ​ຕັ້ງ​ປະຕິບັດ​ວຽກ​ງານ​ຂອງ​ໜ່ວຍ​ງານ​ດັ່ງກ່າວ ​ໃນ​ປີ 2017 ທີ່​ຜ່ານ​ມາ​ໂດຍ​ສະ​ເພາະການຈັດ​ຕັ້ງ​ປະຕິບັດ​ຜົນ​ຂອງ​ກອງ​ປະຊຸມ​ຄັ້ງ​ທີ 21 ທີ່​ໄດ້​ຈັດ​ຂື້ນ​ທີ່​ປະ​ເທດ​ມາ​ເລ​ເຊຍ ​​ແລະ ນອກຈາກ​ນັ້ນ​ກອງ​ປະຊຸມ​ຄັ້ງ​ທີ 22 ນີ້, ບັນດາຊ່ຽວຊານ​ຈາກ​ບັນດາ​ປະ​ເທດສະ​ມາ​ຊິກ​ຍັງ​ໄດ້​ປຶກສາ​ຫາລື​ການ​ຄວບ​ຄຸມ​ການ​ຕົກ​ຄ້າງ​ສູງ​ສຸດ​ຂ​ອງຢາ​ປາບ​ສັດຕູ​ພືດ​ໂດຍ​ເປົ້າ​ໝາຍ​ແມ່ນ​ໃນ​ພືດ ​ແລະ ຜະລິດ​ຕະພັນ​ພືດ​ທີ່​ມີ​ການ​ຄ້າຂາຍ​ຮ່ວມ​ກັນ​ໃນ​ອາ​ຊຽນ​ເປັນ​ຕົ້ນ​ແມ່ນ​ໝາກ​ເພັດ, ໝາກ​ເຂືອ, ໝາກມັງກອນ, ມັງ​ຄຸດ, ລໍາ​ໄຍ, ໝາກ​ຫຸ່ງ ​ແລະ  ອື່ນ​ໆ. ກອງ​ປະຊຸມ​ຄັ້ງ​ນີ້​ມີ​ຄວາມ​ສໍາຄັນ​ຫຼາຍ​ເນື່ອງ​ຈາກ​ເປັນ​ການ​ຈັດ​ຕັ້ງ​ປະຕິບັດ​ຂອງ​ວຽກງານດ້ານ​ຄວາມ​ປອດ​ໄພ​ຂອງ​ອາຫານ​ອາ​ຊຽນ​ໃຫ້​ປາກົດ​ຜົນ​ເປັນ​ຈິງ​ເທື່ອ​ລະກ້າວ.

ຂຽນ​ໂດຍ: ທ. ອ​າລົງ​ກອນ ສຸວັນນະ​ສຸກ

ກວດ​ແກ້​ໂດຍ: ທ່ານ ​ເຂັມ​ພອນ ທິພົມມະຈັນ

​       

   ໃນ​ອາທິດ​ທີ່​ຜ່ານ​ມາຢູ່ທີ່ຫ້ອງປະຊຸມຂອງ ໂຮງແຮມ ຈໍາປາສັກແກຣນ ເມືອງປາກເຊ ແຂວງ ຈໍາປາສັກ ກົມປ່າໄມ້ ກະຊວງກະສິກຳ ແລະ ປ່າໄມ້ ໄດ້ຈັດກອງປະຊຸມຄະນະກຳມາທິການຊີ້ນໍາລະດັບຊາດກ່ຽວກັບການຈັດຕັ້ງປະຕິບັດກົດໝາຍປ່າໄມ້, ການຄຸ້ມຄອງ ແລະ ການຄ້າໄມ້ ເພື່ອຈະເປັນຄູ່ຮ່ວມສັນຍາການຄ້າໄມ້ແບບສະມັກໃຈລະຫວ່າງ ສປປ ລາວ ແລະ ສະຫະພາບເອີລົບ. ໂດຍການເຂົ້າເປັນປະທານຮ່ວມຂອງທ່ານ ປອ ພວງປາລິສັກ ປຣະວົງວຽງຄຳ ຮອງລັດຖະມົນຕີກະຊວງກະສິກຳ ແລະ ປ່າໄມ້, ທ່ານ ໄຊຄໍາ ອຸ່ນມີໄຊ ຮອງປະທານອົງການກວດກາລັດຖະບານ, ທ່ານ ສົມໃຈ ເພັດສີນວນ ປະທານສະພາປະຊາຊົນ ແຂວງຄໍາມ່ວນ, ທ່ານ ບົວສອນ ວົງສອງຄອນ ຮອງເຈົ້າແຂວງ ແຂວງຈຳປາສັກ, ທ່ານ ສຸກສະໄໝ ຈັນທະມາດ ຮອງເຈົ້າແຂວງ ແຂວງ ອັດຕະປື ພ້ອມດ້ວຍ ບັນດານັກວິຊາການທີ່ກ່ຽວຂ້ອງ ແລະ ຜູ້ປະກອບການໂຮງເລື່ອຍເຂົ້າຮ່ວມ 60ກວ່າທ່ານ. ໂດຍຈຸດປະສົງຂອງກອງປະຊຸມໃນຄັ້ງນີ້ ເພື່ອທົບທວນຄວາມຄືບໜ້າ ແລະ ຜົນສຳເລັດຂອງການຈັດຕັ້ງປະຕິບັດແຜນງານປີ 2017 ລວມທັງການປະເມີນຜົນການຈັດຕັ້ງປະຕິບັດຂອງອົງການຈັດຕັ້ງທີ່ກ່ຽວຂ້ອງ. ແຜນງານ ຂອງແຜນງານ , FLEGT/VPA  ລະຫວ່າງ ສປປ ລາວ ​ແລະ ສະຫະພາບ​ເອີ​ລົບ ​ແລະ ​ແຜນ​ວຽກ​ປະ​ຈໍາປີ 2018 ​ເຊີ່ງ​ແຜນ​ງານ FLEGT ​ໄດ້​ສະໜັບສະໜູນ​ການຈັດຕັ້ງປະຕິບັດ​ຄໍາ​ສັ່ງ​ຂອງ​ນາຍົກລັດຖະມົນຕີສະບັບ​ເລກທີ 15/ນຍ ມີ​ຈຸດປະ​ສົງ​ເພື່ອ​ເພີ້​ມທະວີ​ໃນ​ການ​ຄຸ້ມ​ຄອງ​ປ່າ​ໄມ້ ​ແລະ ສະກັດ​ກັ້ນທຸລະ​ກິດ​ທີ່​ກ່ຽວຂ້ອງ​ກັບ​ການ​ຄ້າ​ໄມ້​ຜິດ​ກົດໝາຍ. ​ໃນ​ກອງ​ປະຊຸມ​ຄະນະ​ປະທານ​ໄດ້​ໃຫ້​ທິດ​ຊີ້​ນຳ​ໃນ​ການ​ຫັນປ່ຽນ​ເນື້ອ​ທີ່​ດີ​ນປ່າ​ໄມ້​ເປັນ​ເຂດ​ດີ​ນພັດທະນາ​ຄວນ​ໃຫ້​ມີ​ເຂດ​ແດນ​ລະອຽດ, ຄວນ​ມີ​ການ​ກວດກາ​ປະ​ເມີນ​ຜົນ​ໃນ​ການ​ຂຸດ​ຄົ້ນ​ໄມ້ ​ແລະ ການ​ປະຕິບັດ​ຄຳ​ສັ່ງ​ເລກທີ 15/ນຍ ​ໃຫ້​ເກີດ​ຜົນ​ສູງ, ​ເຂັ້ມງວດ​ກັບ​ບັນດາ​ໂຮງ​ເລື່ອຍຕ່າງໆ ​ໃຫ້​ໄປ​ຕາມ​ລະບົບ ​ແລະ ບົດ​ລົງ​ໂທດ​ຕໍ່​ພະນັກງານ​ທີ່ກະທຳ​ຜິດ. ກອງ​ປະຊຸມ​ໄດ້​ດຳ​ເນີນ​ໄປ​ເປັນ​ເວລາ 1 ວັນ​ເຕັມ ​ແລະ ປິດ​ລົງ​ໃນ​ຕອນ​ແລງ​ຂອງ​ວັນ​ດຽວ​ກັນ.

ຂຽນໂດຍ: ທ.ອາ​ລົງ​ກອນ ສຸວັນນະ​ສຸກ

                                                                   ກ​ວດ​ແກ້​: ທ່ານ ​ເຂັມ​ພອນ ທິພົມມະຈັນ

        ໃນທ້າຍ ອາທິດຜ່ານມາ, ຢູ່ຫ້ອງຮັບແຂກກະຊວງກະສິກໍາ ແລະປ່າໄມ້ ທ່ານ ປ.ອ ລຽນ ທີແກ້ວ ລັດຖະມົນຕີ ກະຊວງກະສິກໍາ ແລະ ປ່າໄມ້ ໄດ້ໃຫ້ກຽດຕ້ອນຮັບ ຄະນະຜູ້ແທນຈາກ ປະເທດມົງໂກລີ ນໍາໂດຍ   ທ່ານ ນ. ຈານິມຄານ ຊາອຸເລ ຮອງລັດຖະມົນຕີ ກະຊວງສະບຽງອາຫານ, ກະສິກໍາ ແລະ ອຸດສາຫະກໍາເບົາ ປະເທດມົງໂກລີ, ພ້ອມດ້ວຍແຂກ ທັງສອງຝ່າຍເຂົ້າຮ່ວມ.

    ໂອກາດນີ້, ທ່ານ ຮອງລັດຖະມົນຕີ ກະຊວງສະບຽງອາຫານ, ກະສິກໍາ ແລະ ອຸດສາຫະກໍາເບົາ ປະເທດມົງໂກລີ ໄດ້ສະແດງຄວາມ ຍ້ອງຍໍຊົມເຊີຍ ຕໍ່ລັດຖະບານລາວ ເວົ້າລວມ, ເວົ້າສະເພາະແມ່ນ ການນໍາຂອງກະຊວງກະສິກໍາ ແລະ ປ່າໄມ້ ທີ່ອໍານວຍຄວາມສະດວກຕໍ່ການຮ່ວມມື້ໃນຂົງເຂດ ວຽກງານ ກະສິກໍາ ແລະ ປ່າໄມ້ ໄລຍະຜ່ານມາ ຊື່ງມີບາດກ້າວຂະຫຍາຍຕົວ ທັງໄດ້ຮັບການຕ້ອນຮັບ ຢ່າງອົບອຸ່ນ. ທັງສອງຝ່າຍໄດ້ປຶກສາຫາລືກັນກ່ຽວກັບ ການຮ່ວມມື ວຽກວຽກງານ ໃນຂະແໜງ ການກະສິກໍາ ແລະ ປ່າໄມ້. ພ້ອມນີ້, ລັດຖະບານ ແຫ່ງມົງໂກລີ ຍັງໄດ້ກະກຽມສັດລ້ຽງ ປະເພດແກະ ຈໍານວນ 8.000 ໂຕ   ເພື່ອມອບໃຫ້ແກ່ຝ່າຍລາວເພື່ອເອົາມາລ້ຽງ ແລະ ວິຊາການ ອີກຈໍານວນໜຶ່ງ ເພື່ອມາເບິ່ງແຍງ ສຸຂະພາບສັດດັ່ງກ່າວ. ໃນຕອນທ້າຍ, ທ່ານ ປ.ອ ລຽນ ທີແກ້ວ ລັດຖະມົນຕີ ກະຊວງກະສິກໍາ ແລະ ປ່າໄມ້ ໄດ້ສະແດງຄວາມຊົມເຊີຍຕໍ່ວຽກງານການຮ່ວມມື ຂອງລັດຖະບານ ສອງປະເທດ ໂດຍສະເພາະ ແມ່ນການຮ່ວມມືຂອງການນໍາທັງສອງກະຊວງ ລະຫວ່າງ ລາວ-ມົງໂກລີ ທີ່ມີສາຍພົວພັນອັນດີງາມ ແລະ ຫວັງວ່າຈະໄດ້ຮັບການສືບຕໍ່ວຽກງານ ຮ່ວມມືກັນໃນຕໍ່ໜ້າໃຫ້ຫຼາຍຂຶ້ນ ກວ່າເກົ່າ.

ຂ່າວໂດຍ: ສອນເພັດ ສຸລິພອນ

ກວດແກ້ໂດຍ:. ທ່ານ ນ. ປ້ອມ ພັນທະວົງ

    ເພື​່ອ​ເປັນ​ກາ​ນທົບ​ທວນຄືນ​ກ່ຽວ​ກັບ​ການ​​ເຄື່ອນ​ໄຫວ ​ແລະ ຄວາມ​ຄື​ບໜ້າ​ໃນ​ການຈັດ​ຕັ້ງ​ປະຕິບັດ​ວຽກງານ​ຄວາມ​ກ້າວໜ້າ​ຂ​ອງ​ແມ່ຍິງ ​ແລະ ​ແມ່ ​ແລະ ​ເດັກ ​ໃນ​ໄລຍະ​ຜ່ານ​ມາ, ໃນວັນທີ 18-19 ມັງກອນນີ້, ຫ້ອງການກະຊວງ, ກະຊວງກະສິກຳ ແລະ ປ່າໄມ້ໄດ້ຈັດກອງປະຊຸມທົບທວນຄືນວຽກງານຄວາມກ້າວໜ້າແມ່ຍິງ ແລະ ແມ່-ເດັກ ປະຈຳປີ 2017 ຂື້ນ, ທີໂຮງແຮມທະວີສຸກ, ເມືອງ ວັງວຽງ, ແຂວງວຽງຈັນ, ໂດຍການເປັນທານຂອງທ່ານ ຄຳບຸນນັດ ໄຊຍະນົນ ຮອງລັດຖະມົນຕີ ກະຊວງ ກະສິກຳ ແລະ ປ່າໄມ້, ທັງເປັນຫົວໜ້າຄະນະກຳມາທິການຄວາມກ້າວໜ້າແມ່ຍິງ ແລະ ແມ່-ເດັກ, ມີຮອງຫົວໜ້າຫ້ອງການ, ຮອງກົມ, ຫົວໜ້າພະແນກ, ຮອງພະແນກ ຕາງໜ້າຈາກບັນດາກະຊວງອ້ອມຂ້າງ, ໂຄງການ ແລະ ແຂກຖືກເຊີນເຂົ້າຮ່ວມ 116ທ່ານ, ຍິງ 59 ທ່ານ.
Continue reading →

      ເພື່ອເປັນການສືບຕໍ່ການຈັດຕັ້ງປະຕິບັດວຽກງານການຮ່ວມມືທີ່ດີງາມ ໃນຂະແໜງການກະສິກໍາ ແລະ ປ່າໄມ້ ລະຫວ່າງ ສປປ ລາວ ແລະ ໄທ ໃນຕອນເຊົ້າວັນທີ 26 ທັນວາ 2017 ນີ້, ສູນພັດທະນາ ແລະ ບໍລິການດ້ານການກະເສດຫ້ວຍຊອນ-ຫ້ວຍຊົ້ວ ທີ່ຂຶ້ນກັບ ຫ້ອງການກະຊວງກະສິກໍາ ແລະ ປ່າໄມ້ ໄດ້ຈັດກອງປະຊຸມສະຫຼຸບວຽກງານການຮ່ວມມື ປະຈໍາປີ 2017 ແລະ ວາງແຜນການປີ 2018 ຂຶ້ນຢູ່ທີ່ໂຮງແຮມ ແຟນມິລີ ບູຕິກ, ນະຄອນຫຼວງວຽງຈັນ ໃຫ້ກຽດເຂົ້າຮ່ວມ ຝ່າຍລາວນໍາໂດຍທ່ານ ຄໍາພັນ ເໝືອນສິດທິດາ ຫົວໜ້າຫ້ອງການກະຊວງ ກະສິກໍາ ແລະປ່າໄມ້, ທ່ານ ອານຸລົມ ຕຸນາລົມ ຫົວໜ້າສູນພັດທະນາ ແລະ ບໍລິການດ້ານການກະເສດຫ້ວຍຊອນ-ຫ້ວຍຊົ້ວ, ຝ່າຍໄທ ນໍາໂດຍທ່ານ ລະລິດ ຖະນອມສິງ ຮອງເລຂາທິການ ຄະນະກໍາມະການ ຜູ້ປະສານງານ ໂຄງການອັນສືບເນື່ອງມາຈາກພະຣາດຊະດໍາຣິ. ມີ ອຸປະທູດໄທ ປະຈໍາລາວ ພ້ອມດ້ວຍຜູ້ແທນທັງສອງຝ່າຍ. Continue reading →

ກອງທຶນສາກົນເພື່ອການພັດທະນາກະສິກຳ (IFAD) ຮ່ວມກັບລັດຖະບານບຼາຊິນ, ອົງການອາຫານ ແລະ ການກະເສດແຫ່ງສະຫະປະຊາຊາດ (FAO), ຫ້ອງການປະສານງານຮ່ວມມືໃຕ້-ໃຕ້ ຂອງອົງການສະຫະປະຊາຊາດ  ແລະ ອົງ ການທີ່ດິນສາກົນ ຮ່ວມ​ກັນຈັດກອງປະຊຸມສາກົນກ່ຽວກັບການຮ່ວມມືໃຕ້-ໃຕ້ ແລະ ການຮ່ວມມື 3 ຝ່າຍຂຶ້ນ ໃນລະຫວ່າງວັນທີ 18-24 ພະຈິກ 2017, ທີ່ນະຄອນຫຼວງບຼາຊິເລຍ, ປະເທດບຼາຊິນ, ພາຍໃຕ້ຫົວຂໍ້: “ການນຳໃຊ້ນະວັດຕະກຳ​ໃໝ່ຢູ່ໃນໂລກ ເພື່ອສະໜັບສະໜູນການພັດທະນາຊົນນະບົດ”. ໃຫ້ກຽດເປັນປະທານໄຂກອງປະຊຸມ ​ໂດຍທ່ານ ​ແຮນຣິກ ດອຍ​ໂກ ​ເດີ ​ໂອ​ລີ​ເວຍຣາ ລັດຖະມົນຕີກະຊວງແຜນການ, ການພັດທະນາ ແລະ ການບໍລິຫານຂອງປະເທດບຼາຊິນ, ທ່ານ ​ໄບຼ​ໂຣ ບ໊ອກສ ​ແມ​ກຈີ ລັດຖະມົນຕີກະຊວງກະສິກຳ, ການລ້ຽງສັດ ແລະ ການສະໜອງອາຫານ ຂອງ ປະເທດບຼາຊິນ ແລະ ທ່ານ ຈີວ​ເບີດ ​ເອັຟ ຮຸງ​ໂບ ປະທານກອງທຶນສາກົນເພື່ອການພັດທະນາກະສິກຳ, ມີຜູ້ເຂົ້າຮ່ວມທັງໝົດ 350 ກວ່າທ່ານ, ໃນນີ້ ມີທ່ານລັດຖະ ມົນຕີ, ຮອງລັດຖະມົນຕີ, ຊ່ຽວຊານ ແລະ ພະນັກງານອາວຸໂສ ທີ່ມາຈາກບັນດາປະເທດສະມາຊິກຂອງ IFAD, ອົງການຈັດ ຕັ້ງສາກົນ, ສະຖາບັນການເງິນສາກົນ, ສະຖາບັນການສຶກສາ, ສະຖາບັນຄົ້ນຄວ້າ, ອົງການຈັດຕັ້ງທາງສັງຄົມ, ພາກທຸລະກິດ ແລະ ອື່ນໆ. ສຳລັບ ສປປລາວ ເຂົ້າຮ່ວມກອງປະຊຸມໃນຄັ້ງນີ້ມີ ທ່ານ ປອ. ພວງປາຣິສັກ ປຣະວົງວຽງຄໍາຮອງລັດຖະມົນຕີກະຊວງກະສິກຳ ແລະ ປ່າໄມ້ ພ້ອມດ້ວຍຄະນະ 2 ທ່ານເຂົ້າຮ່ວມ. Continue reading →

ດິນແມ່ນວັດຖຸທຳມະຊາດທີ່ເກີດຈາກການຜຸພັງຂອງແຮ່ ແລະ ຫີນຕົ້ນກຳເນີດ, ລວມທັງຊາກພືດ ແລະ ຊາກສັດທີ່ເນົ່າເປື່ອຍສະສົມປະປົນກັນ, ດິນມີອາຍຸການນຳໃຊ້ຄືສິ່ງທີ່ມີຊີວິດອື່ນໆ ຖ້າບໍ່ມີການປົກປັກຮັກສາ, ການນໍາໃຊ້ປະໂຫຍດ ແລະ ການປັບປຸງບຳລຸງດິນທີ່ຖືກຕ້ອງ ດິນກໍ່ຈະເຊື່ອມຄຸນນະພາບ ແລະ ສະຫຼາຍໂຕໄປໃນທີ່ສຸດ. ໃນກອງປະຊຸມຂອງສະຫະປະຊາຊາດ ຄັ້ງທີ 38 (ເດືອນທັນ ວາ 2013) ທີ່ກຸງໂລມ, ປະເທດອີາຕາລີ ໄດ້ຕົກລົງເອົາວັນທີ 5 ທັນວາ ຂອງທຸກໆປີເປັນວັນດິນໂລກ. Continue reading →

ເພື່ອເປັນການຮັບປະກັນການສະໜອງນໍ້າໃຫ້ພຽງພໍ, ມີປະສິດທິພາບ ແລະ ທ່ວງທັນກັບລະດູການຜະລິດ​. ອີງຕາມກົດໝາຍຊົນລະປະທານສະບັບເລກທີ 261/ສພຊ, ລົງວັນທີ 14 ທັນວາ 2012, ເຊີ່ງກຳນົດເອົາວັນທີ 3 ພະຈິກຂອງທຸກໆປີເປັນວັນຊົນລະປະທານແຫ່ງຊາດ, ພະແນກກະສິກຳແລະປ່າໄມ້ແຂວງຄຳມ່ວນໄດ້ສ້າງ​ຂະ​ບວນ​ການ​ອະ​ນາໄມ​ລວງ​ຄອງເໝືອງ ແລະ ປ່ອຍນ້ຳ​ຊົນລະປະທານສະໜອງນໍ້າ​ໃຫ້ແກ່​ເນື້ອທີ່​ການ​ຜະລິດ​ລະດູແລ້ງ ສົກ​ປີ 2017-2018 ໃນ​ວັນ​ທີ 15 ພະຈິກ 2017 ທີ່​ບ້ານຍົມມະລາດໃຕ້ ເມືອງ​ຍົມມະລາດແຂວງຄຳມ່ວນ ໂດຍການເຂົ້າຮ່ວມຂອງ ທ່ານ ປອ. ລຽນ ທິ​ແກ້ວ ລັດຖະມົນຕີກະຊວງ​ກະສິ​ກຳແລະ ປ່າໄມ້.ທ່ານຮອງເຈົ້າແຂວງແຂວງ ຄຳ ມ່ວນ, ທ່ານເຈົ້າເມືອງ ຍົມ ມະລາດ ແລະ ບັນດາພາກສ່ວນທີ່ກຽ່ວຂອ້ງ ພ້ອມດ້ວຍອຳນາດການປົກຄອງບ້ານດັ່ງກາວ ເຂົ້າ​ຮ່ວມຢ່າງພ້ອມພຽງ. Continue reading →

                 ເພື່ອໃຫ້ວຽກງານການຄຸ້ມຄອງບໍລິຫານຈັດການອ່າງນ້ຳເທີນ 2 ໃຫ້ມີຄວາມຢືນຍົງ. ໃນວັນທີ 15 ພະຈີກ ຜ່ານມາສະພາບໍລິຫານອົງການຄຸ້ມຄອງແລະ ປົກປັກຮັກສາແຫຼ່ງນ້ຳເທີນ 2 ໄດ້ຈັດກອງປະຊຸມສະໄໝສາມັນຄັ້ງທີ XV ຂຶ້ນໂດຍການເປັນປະທານຂອງ ທ່ານ ປອ. ລຽນ ທີແກ້ວ ລັດຖະມົນຕີກະຊວງກະສິກຳ ແລະ ປ່າໄມ້ ທັງເປັນຫົວໜ້າສະພາບໍລິຫານອົງການຄຸ້ມຄອງແລະ ປົກປັກຮັກສາແຫຼ່ງນ້ຳເທີນ 2 ນອກນັ້ນຍັງມີ ບັນດາທ່ານ ຮອງປະທານ, ຄະນະສະພາບໍລິຫານ ແລະ ຫົວໜ້າກອງເລຂາອົງການຄຸ້ມຄອງແລະ ປົກປັກຮັກສາແຫຼ່ງນ້ຳເທີນ 2 ເຂົ້າຮ່ວມ. Continue reading →