Khemmalay SONDAVANH
ເປີດກອງປະຊຸມສະຫຼຸບວຽກງານກະສິກໍາ, ປ່າໄມ້ ແລະ ພັດທະນາຊົນນະບົດປະຈໍາປີ 2017 ແລະ ທິດທາງແຜນການປີ 2018
ທ່າມກາງບັນຍາກາດທີ່ທົ່ວພັກທົ່ວກອງທັບ ແລະ ທົ່ວປວງຊົນລາວ ກໍາລັງກະກຽມສະຫຼຸບການຈັດຕັ້ງປະຕິບັດວຽກງານຕາມມະຕິກອງປະຊຸມໃຫຍ່ຄັ້ງທີ X ຂອງພັກໃນໄລຍະກາງສະໄໝກໍຄືການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ ແຫ່ງຊາດ 5 ປີ ຄັ້ງທີ VIII ແລະ ແຜນພັດທະນາກະສິກໍາ, ປ່າໄມ້ ແລະ ພັດທະນາຊົນນະບົດ 2016 ຫາ 2020, ກະຊວງກະສິກໍາ ແລະ ປ່າໄມ້ ໄດ້ເປີດກອງປະຊຸມສະຫຼຸບວຽກງານກະສິກໍາ, ປ່າໄມ້ ແລະ ພັດທະນາຊົນນະບົດປະຈໍາປີ 2017 ຂື້ນ ໃນວັນທີ 6 ມີນາ 2018, ທີ່ຫໍປະຊຸມແຫ່ງຊາດ ໃຫ້ກຽດເປັນປະທານກ່າວເປີດ ໂດຍທ່ານ ປອ ລຽນ ທີແກ້ວ ລັດຖະມົນຕີກະຊວງກະສິກໍາ ແລະ ປ່າໄມ້, ພ້ອມດ້ວຍທ່ານຮອງລັດຖະມົນຕີກະຊວງ, ມີທ່ານຮອງປະທານກໍາມາທິການເສດຖະກິດ ເຕັກໂນໂລຊີ ແລະ ສິ່ງແວດລ້ອມ ສະພາແຫ່ງຊາດ, ຮອງຫົວໜ້າອົງການ ແລະ ທຽບເທົ່າ, ຮອງເຈົ້າແຂວງ, ເຈົ້າຄອງນະຄອນຫຼວງວຽງຈັນ, ທ່ານຫົວໜ້າຫ້ອງການກະຊວງ, ບັນດາກົມ, ສະຖາບັນ, ຫົວໜ໊າພະແນກກະສິກໍາ ແລະ ປ່າໄມ້ ແຂວງ, ນະຄອນຫຼວງ ພ້ອມດ້ວຍແຂກຖືກເຊີນເຂົ້າຮ່ວມຢ່າງພ້ອມພຽງ.
ຈຸດປະສົງຂອງກອງປະຊຸມໃນຄັ້ງນີ້ເພື່ອເປັນການສະຫຼຸບຜົນການຈັດຕັ້ງປະຕິບັດວຽກງານປະຈໍາປີ 2017 ແລະ ທິດທາງແຜນການປີ 2018 ເພື່ອສັງເກດຕີລາຄາຜົນງານ, ຜົນສໍາເລັດດ້ານດີ, ດ້ານອ່ອນ, ຂໍ້ຄົງຄ້າງ ແລະ ເພື່ອກໍານົດທິດທາງ, ໜ້າທີ, ມາດຕະການ ແລະ ນະໂຍບາຍໃຫ້ແທດເໝາະກັບສະພາບຄວາມເປັນຈິງ, ເປົ້າໝາຍເພື່ອກໍານົດມາດຕະການຈັດຕັ້ງປະຕິບັດແຕ່ສູນກາງລົງຮອດທ້ອງຖິ່ນ ໃຫ້ມີຈຸດສຸມທີ່ເປັນເອກະພາບກັນເພື່ອເຮັດໃຫ້ 4 ແຜນງານໃຫຍ່ຄື: ແຜນງານຄໍ້າປະກັນສະບຽງອາຫານ, ແຜນງານຜະລິດກະສິກໍາເປັນສິນຄ້າຕິດພັນກັບການປຸງແຕ່ງ, ແຜນງານຄຸ້ມຄອງປ່າໄມ້ ແລະ ຊັບພະຍາກອນປ່າໄມ້ ແລະ ແຜນງານພັດທະນາຊົນນະບົດ ແລະ ລຶບລ້າງຄວາມທຸກຍາກທົ່ວປະເທດ ແລະ ສູ້ຊົນຈັດຕັ້ງປະຕິບັດຄາດໝາຍປີ 2018 ຂອງຂະແໜງກະສິກໍາ ແລະ ປ່າໄມ້ ທີ່ມະຕິສະພາແຫ່ງຊາດ ແລະ ດໍາລັດນາຍົກລັດຖະມົນຕີກ່ຽວກັບແຜນພັດທະນາເສດຖະກິດ-ສັງຄົມແຫ່ງຊາດປີ 2018 ໃຫ້ປາກົດຜົນເປັນຈິງ, ເຊິ່ງກອງປະຊຸມດັ່ງກ່າວຈະໄດ້ດໍາເນີນໄປເປັນເວລາ 2 ວັນ ແລະ ຈະໄດ້ປິດລົງໃນວັນທີ 7 ມີນາ 2018 ນີ້.
ພາບ ແລະ ຂ່າວໂດຍ: ພະແນກໂຄສະນາ ແລະ ຂ່າວສານ
ກອງປະຊຸມສໍາມະນາລະດັບຊາດ ກ່ຽວກັບການສົ່ງເສີມປູກໄມ້ ແລະ ຟື້ນຟູປ່າເພື່ອປະກອບສ່ວນຄວາມປົກຫຸ້ມໃຫ້ໄດ້ 70 ສ່ວນຮ້ອຍ ໃນປີ 2020
ໃນວັນທີ 5 ມີນາ 2018 ກະຊວງ ກະສິກໍາ ແລະ ປ່າໄມ້, ໄດ້ເປີດກອງປະຊຸມສໍາມະນາລະດັບຊາດ ກ່ຽວກັບການສົ່ງເສີມປູກໄມ້ ແລະ ຟື້ນຟູປ່າເພື່ອປະກອບສ່ວນຄວາມປົກຫຸ້ມໃຫ້ໄດ້ 70 ສ່ວນຮ້ອຍ ໃນປີ 2020 ຂື້ນ, ທີ່ຫໍປະຊຸມແຫ່ງຊາດ ພາຍໃຕ້ການເປັນປະທານຂອງທ່ານ ປອ ສອນໄຊ ສີພັນດອນ ຮອງນາຍົກລັດຖະມົນຕີ ແຫ່ງ ສປປ ລາວ ພ້ອມນີ້ມີທ່ານ ປອ ລຽນ ທີແກ້ວ ລັດຖະມົນຕີກະຊວງ ກປ, ທ່ານ ຮອງລັດຖະມົນຕີກະຊວງ ກປ, ທ່ານ ຮອງເຈົ້າແຂວງ, ພະແນກ ກປ ແຂວງ, ນະຄອນຫຼວງ, ຫົວໜ້າ-ຮອງຫົວໜ້າ ຫ້ອງການ, ກົມ, ສະຖາບັນອ້ອມຂ້າງກະຊວງ ແລະ ພາກສ່ວນກ່ຽວຂ້ອງເຂົ້າຮ່ວມຢ່າງພ້ອມພຽງ.
ຈຸດປະສົງຂອງກອງປະຊຸມໃນຄັ້ງນີ້ເພື່ອປຶກສາຫາລືກໍານົດມາດຕະການ ແລະ ນະໂຍບາຍເພື່ອກະຕຸກຊຸກຍູ້ການປູກໄມ້ ແລະ ຟື້ນຟູປ່າໃຫ້ມີຄວາມສອດຄ່ອງ ແລະ ແທດເໝາະກັບສະພາບຈຸດພິເສດຂອງປະເທດເຮົາ ພ້ອມນັ້ນກໍ່ແນ່ໃສ່ແກ້ໄຂບັນຫາປະກົດການຫຍໍ້ທໍ້ ແລະ ຂໍ້ຄົງຄ້າງຕ່າງໆໃນວຽກງານປູກໄມ້ ແລະ ຟື້ນຟູປ່າໃນທົ່ວປະເທດ. ໃນທີ່ປະຊຸມໄດ້ຮັບຟັງການລາຍງານສະພາບການຈັດຕັ້ງປະຕິບັດຍຸດທະສາດປ່າໄມ້ກ່ຽວກັບການປູກໄມ້ ແລະ ຟື້ນຟູປ່າ ແລະ ທິດທາງແຜນການໃນຕໍ່ໜ້າ; ບາງບົດຮຽນກ່ຽວກັບການສົ່ງເສີມການປູກໄມ້ຕິດພັນກັບການປຸງແຕ່ງໄມ້ທີ່ຣາຊະອານາຈັກຊູແອດ; ບາງບົດຮຽນ, ທິດທາງ ແລະ ແຜນການກ່ຽວກັບການປູກ ແລະ ການຕະຫຼາດຊະນິດພັນໄມ້ໃຫຍ່ໄວ; ການປູກ ແລະ ການຕະຫຼາດໄມ້ປູກ ແລະ ໄມ້ພື້ນເມືອງໃນ ສປປ ລາວ. ຫຼັງຈາກນັ້ນ, ທ່ານປະທານກໍ່ໄດ້ເຈາະຈີ້ມບາງບັນຫາດັ່ງນີ້: 1. ນະໂຍບາຍ ແລະ ນິຕິກໍາກ່ຽວກັບການສົ່ງເສີມການປູກໄມ້ ແລະ ຟື້ນຟູປ່າທີ່ຈັດຕັ້ງປະຕິບັດໃນປັດຈຸບັນເຫັນວ່າມີອັນໃດສອດຄ່ອງ ຫຼື ມີອັນໃດທີ່ຈະຕ້ອງໄດ້ປັບປຸງແກ້ໄຂ; 2.ຂໍ້ຫຍຸ້ງຍາກ ຫຼື ອຸປະສັກທີ່ເປັນສິ່ງກົດໜ່ວງຖ່ວງດຶງການລົງທຶນການປູກໄມ້ໃນໄລຍະຜ່ານມາມີຫຍັງແດ່ທີ່ຈະນໍາສະເໜີຕໍ່ລັດຖະບານເພື່ອແກ້ໄຂຢ່າງຂາດຕົວ; 3.ນະໂຍບາຍກ່ຽວກັບການສົ່ງເສີມການປຸງແຕ່ງໄມ້ປູກ ແລະ ການຕະຫຼາດມີອັນໃດແດ່ທີ່ຈະຕ້ອງໄດ້ຮັບການປັບປຸງ; 4. ການພັດທະນາເຕັກນິກ ແລະ ເຕັກໂນໂລຊີ ລວມທັງການພັດທະນາສີມືແຮງງານໃນການປຸງແຕ່ງໄມ້ປູກໃນໄລຍະຜ່ານມາໄດ້ຮັບການປັບປຸງ ແລະ ພັດທະນາຄືແນວໃດ. ຕໍ່ກັບການເຈາະຈີ້ມດັ່ງກ່າວໄດ້ເປີດກ້ວາງປຶກສາຫາລື ແລະ ປະກອບຄໍາເຫັນຈາກບັນດາຜູ້ແທນໃນກອງປະຊຸມດ້ວຍບັນຍາກາດອັນຟົດຟື້ນ.
ພາບ ແລະ ຂ່າວໂດຍ: ພະແນກໂຄສະນາ ແລະ ຂ່າວສານ
ກອງປະຊຸມສະຫຼຸບການຈັດຕັ້ງປະຕິບັດຂໍ້ແຂ່ງຂັນ 3 ດີ ເຄິ່ງສະໄໝ 2015-2017 ແລະ ທິດທາງແຜນການປີ 2018 ຂອງສະຫະພັນແມ່ຍິງກະຊວງ ກະສິກໍາ ແລະ ປ່າໄມ້
ເພື່ອສະເຫຼີມສະຫຼອງວັນແມ່ຍິງສາກົນ 8 ມີນາ 2018 ຄົບຮອບ 108 ປີຢ່າງເປັນຂະບວນຟົດຟື້ນສະຫະພັນແມ່ຍິງກະຊວງກະສິກໍາ ແລະ ປ່າໄມ້ ໄດ້ຈັດກອງປະຊຸມສະຫຼຸບຕີລາຄາການຈັດຕັ້ງປະຕິບັດຂໍ້ແຂ່ງຂັນ 3 ດີ, ໄລຍະ 3 ປີ ເຄິ່ງສະໄໝ 2015 ຫາ2017 ແລະ ວາງທິດທາງແຜນການປີ 2018 ຂື້ນ ໃນວັນທີ 02 ມີນາ 2018 ທີ່ສະໂມສອນກະຊວງກະສິກໍາ ແລະ ປ່າໄມ້, ໂດຍໃຫ້ກຽດເປັນປະທານຂອງ ທ່ານ ທອງພັດ ວົງມະນີ ຮອງເລຂາຄະນະພັກກະຊວງ, ຮອງລັດຖະມົນຕີກະຊວງກະສິກໍາ ແລະ ປ່າໄມ້, ທ່ານ ນາງ ບົວຈັນ ສີຫານາດ ຮອງປະທານສູນກາງສະຫະພັນແມ່ຍິງລາວ, ທ່ານ ນາງ ບຸນທຽນ ວົງໄກສອນ ປະທານສະຫະພັນແມ່ຍິງກະຊວງກະສິກໍາ ແລະ ປ່າໄມ້ ພ້ອມນີ້ມີຄະນະພັກຮາກຖານບັນດາກົມ, ສະຖາບັນ, ອົງການຈັດຕັ້ງຊາວໜຸ່ມ, ກໍາມະບານ, ຄະນະຮາກຖານ ແລະ ໜ່ວຍສະຫະພັນແມ່ຍີງອ້ອມຂ້າງກະຊວງ ພ້ອມດ້ວຍເອື້ອຍນ້ອງສະມາຊີກເຂົ້າຮ່ວມ 100 ກວ່າທ່ານ.
ໃນກອງປະຊຸມໄດ້ມີການຜ່ານບົດສະຫຼຸບການຈັດຕັ້ງປະຕິບັດຂໍ້ແຂ່ງຂັນ 3 ດີ ເຄິ່ງສະໄໝ 2015-2017 ແລະ ວາງທິດທາງແຜນການ ປີ 2018 ໂດຍປະທານສະຫະພັນແມ່ຍິງກະຊວງກະສິກໍາ ແລະ ປ່າໄມ້, ພ້ອມທັງມອບໃບຍ້ອງຍໍ 3 ດີໃຫ້ຮາກຖານ, ໜ່ວຍ ແລະ ບຸກຄົນ 3 ດີ ປະເພດ 1 ຈໍານວນ 603 ຄົນ ແລະ ປະເພດ 2 ຈໍານວນ 20 ຄົນ ຈາກນັ້ນແຕ່ລະຮາກຖານກໍ່ໄດ້ຂຶ້ນຈັບມືແຂ່ງຂັນ 3 ດີ ຮວ່ມກັນ. ໃນໂອກາດດຽວກັນ ບັນດາຜູ້ເຂົ້າຮ່ວມຍັງໄດ້ຮັບຟັງປາຖະກະຖາ ແລະ ໂອ້ລົມຈາກ ທ່ານ ນາງ ບົວຈັນ ສີຫານາດ ຮອງປະທານສູນກາງສະຫະພັນແມ່ຍິງລາວ ແລະ ໄດ້ມີການມອບໃບກຽດຕິຄຸນໃຫ້ເລຂາຄະນະພັກແຕ່ລະຮາກຖານ, ມອບຂອງຂວັນໃຫ້ປ້າອາວຸໂສບໍານານ, ຄອບ ຄົວການນໍາຄະນະສະຫະພັນແມ່ຍີງກະຊວງ ແລະ ມອບດອກໄມ້ໃຫ້ເອື້ອຍນອ້ງສະມາຊິກໃນທີ່ປະຊຸມ. ໃນຕອນທ້າຍ ທ່ານປະທານກອງປະຊຸມໄດ້ສະແດງຄວາມຍ້ອງຍໍຊົມເຊີຍໃນການສູ້ຊົນຂອງເອື້ອຍນ້ອງຍິງທີ່ສາມາດຍາດໄດ້ໝາກຜົນ ແລະ ຜົນສໍາເລັດ ຈາກການເຄື່ອນໄຫວໃນໄລຍະ 3 ປີຜ່ານມາ, ພ້ອມທັງເອົາໃຈໃສ່ຕິດຕາມກວດກາການຮ່ວມຊີວິດປະຈໍາ 1 ເດືອນ, 3 ເດືອນ, 6 ເດືອນ ແລະ 1 ປີ ເພື່ອສະຫຼຸບຕີລາຄາ, ຖອດຖອນບົດຮຽນ ແລະ ວາງແຜນການໃນຕໍ່ໜ້າ, ຍົກລະດັບຄວາມຮູ້ທາງດ້ານວິຊາສະເພາະ, ທິດສະດີການເມືອງ ແລະ ຄຸນສົມບັດ ສິນ ທຳປະຕິວັດໃຫ້ສູງຂຶ້ນ, ເສີມຂະຫຍາຍມູນເຊື້ອວັດທະນະທຳ, ຮີດຄອງປະເພນີອັນດີງາມ, ບຸກບືນສືບຕໍ່ປະຕິບັດບົດ ບາດ ຄວາມສະເໝີພາບລະຫວ່າງຍິງ-ຊາຍ ໃນການພັດທະນາຄວາມກ້າວໜ້າຂອງແມ່ຍິງ, ຕັ້ງໜ້າປະກອບສ່ວນເຂົ້າໃນພາລະກິດລວມຂອງຊາດເວົ້າລວມເວົ້າສະເພາະກໍ່ຄືປະກອບສ່ວນສຸມໃສ່ປະຕິບັດຂໍ້ແຂ່ງຂັນຂອງຂະແໜງກະສິກໍາ ແລະ ປ່າໄມ້ ຕາມ 3 ເນື້ອໃນ ແລະ 4 ເປົ້າໝາຍ, ສືບຕໍ່ເຊື່ອມຊືມ ແລະ ຕັ້ງໜ້າປະຕິບັດຂໍ້ແຂ່ງຂັ້ນ 3 ດີ ຂອງສູນກາງສະຫະພັນແມ່ຍີງລາວຄື: ພົນລະເມືອງດີ, ພັດທະນາດີ ແລະ ສ້າງຄອບຄົວດີ ໃຫ້ໄດ້ຕາມຄາດໝາຍ.
ພາບ ແລະ ຂ່າວໂດຍ: ພະແນກໂຄສະນາ ແລະ ຂ່າວສານ
ພິທີມອບ-ຮັບ ກິດຈະກໍາ, ງົບປະມານ ແລະ ຄວາມຮັບຜິດຊອບຂອງ ”ແຜນງານຊຸມຊົນຊື່ນໃຈ” ຢູ່ 2 ແຂວງ ພາກເໜືອ
ແຜນງານຄໍ້າປະກັນສະບຽງອາຫານ ແລະ ໂອກາດທາງເສດຖະກິດໃນຊຸມຊົນ” ແຜນງານຊຸມຊົນຊື່ນໃຈ”, ທີ່ຂື້ນກັບກົມແຜນການ ແລະ ການເງິນ, ກະຊວງກະສິກໍາ ແລະ ປ່າໄມ້. ເປັນແຜນງານໜຶ່ງທີ່ໄດ້ຈັດຕັ້ງປະຕິບັດ ແລະ ຜັນຂະຫຍາຍແຜນພັດທະນາເສດຖະກິດສັງຄົມແຫ່ງຊາດທີ່ພັກ ແລະ ລັດຖະບານ ແຫ່ງ ສປປ ລາວ ໄດ້ວາງອອກ, ປະກອບສ່ວນເຂົ້າໃນການຫຼຸດຜ່ອນຄວາມທຸກຍາກຂອງປະຊາຊົນບັນດາເຜົ່າຢູ່ໃນເຂດຊົນນະບົດຫ່າງໄກສອກຫຼີກ 09 ເມືອງ, 255 ບ້ານຂອງສອງແຂວງຄື: ໄຊຍະບູລີ ແລະ ອຸດົມໄຊ, ແຜນງານດັ່ງກ່າວໄດ້ເລີ່ມຈັດຕັ້ງປະຕິບັດແຕ່ປີ 2012 ແລະ ຈະໄດ້ສີ້ນສຸດລົງໃນທ້າຍເດືອນກຸມພາ 2018 ນີ້ ລວມໄລຍະເວລາຂອງແຜນງານ 6 ປີ, ໂດຍໄດ້ຮັບການສະໜັບສະໜູນທຶນຊ່ວຍເຫຼືອລ້າຈາກອົງການພັດທະນາກະສິກໍາ ສາກົນ, ອົງການພັດທະນາປະເທດ ລຸກຊໍາບວກ ແລະ ອົງການອາຫານໂລກ, ເພື່ອໃຫ້ບັນດາກິດຈະກໍາຕ່າງໆທີ່ທາງແຜນງານໄດ້ກໍ່ຕັ້ງຂື້ນມາແລ້ວນັ້ນໃຫ້ມີຄວາມຍືນຍົງ, ມີການເຄື່ອນໄຫວຢ່າງຕໍ່ເນື່ອງ ແລະ ເຮັດໃຫ້ຊຸມຊົນມີຄວາມເຂັ້ມແຂງໄປເລື່ອຍໆນັ້ນ. ໃນວັນທີ 20 ແລະ 22 ກຸມພາ 2018 ທີ່ຫ້ອງປະຊຸມຂອງພະແນກກະສິກໍາ ແລະ ປ່າໄມ້ ແຂວງ ໄຊຍະບູລີ ແລະ ອຸດົມໄຊ ແຜນງານຊຸມຊົນຊື່ນໃຈໄດ້ຈັດພິທີເຊັນບົດບັນທຶກມອບ-ຮັບ ບັນດາກິດຈະກໍາ, ອຸປະກອນ ແລະ ການຄຸ້ມຄອງ ໃຫ້ແຂວງເປົ້າໝາຍເຊິ່ງປະກອບດ້ວຍກິດຈະກໍາການສົ່ງເສີມການຜະລິດ, ການປູກ, ການລ້ຽງ ຫຼາຍກ່ວາ 20 ກິດຈະກໍາ, ກອງທຶນໃນການພັດທະນາບ້ານ, ທະນາຄານເຂົ້າ, ງົບປະມານໃນການຝຶກອົບຮົມ ແລະ ສ້າງຄວາມສາມາດໃຫ້ທ້ອງຖິ່ນ, ພາຫະນະ ແລະ ອຸປະກອນຮັບໃຊ້ລວມທັງພື້ນຖານໂຄງລ່າງ ລວມມູນຄ່າເກືອບ 70 ຕື້ກີບ.
ກ່ອນການເຊັນມອບ-ຮັບຜູ້ເຂົ້າຮ່ວມໄດ້ຮັບຟັງການລາຍງານການຈັດຕັ້ງປະຕິບັດວຽກແຜນງານຈາກຜູ້ປະສານງານປະຈໍາແຂວງ ແລະ ຮັບຟັງການຜ່ານໜັງສືມອບ-ຮັບກິດຈະກໍາຂອງແຜນງານ ໂດຍ ທ່ານ ຄອນສະຫວັນ ວົງໄຊ ຫົວໜ້າປະສານງານແຜນງານຂັ້ນສູນກາງ, ພິທີມອບ-ຮັບແຜນງານຄໍ້າປະກັນສະບຽງອາຫານ ແລະ ໂອກາດທາງເສດຖະກິດໃນຊຸມຊົນ ໃຫ້ແຂວງເປັນຜູ້ຄຸ້ມຄອງນີ້ ເປັນກຽດກ່າວມອບໂດຍທ່ານ ສະຫວັນຫານພົມ ຮອງຫົວໜ້າກົມແຜນການ ແລະ ການເງິນ ຄະນະກໍາມະການຊີ້ນໍາໂຄງການຂັ້ນສູນກາງ ຕ່າງໜ້າກະຊວງກະສິກໍາ ແລະ ປ່າໄມ້ ແລະ ຕ່າງໜ້າກ່າວຮັບຂອງແຂວງ ໄຊຍະບູລີ ໂດຍທ່ານ ຄໍາຫຼ້າ ຜີ້ວນາວັນ ຫົວໜ້າພະແນກ ກະສິກໍາ ແລະ ປ່າໄມ້ ແຂວງແລະ ແຂວງ ອຸດົມໄຊ ໂດຍ ທ່ານ ບຸນຍືມ ໄຊຍະເວັນ ຮອງຫົວໜ້າພະແນກກະສິກໍາ ແລະ ປ່າໄມ້ ແຂວງ. ພິທີມອບ-ຮັບໃນຄັ້ງນີ້ເປັນກຽດເຂົ້າຮ່ວມຂອງ ທ່ານ ຍັນຍົງ ສີປະເສີດ ຮອງເຈົ້າແຂວງໆ ໄຊຍະບູລີ, ມີຫົວໜ້າປະສານງານແຜນງານຂັ້ນສູນກາງ, ຊຽວຊານຄຸ້ມຄອງໂຄງການ ແລະ ຄະນະທີມງານຈາກບັນດາກົມທີ່ຂື້ນກັບຊວງກະສິກໍາ ແລະ ປ່າໄມ້, ເຈົ້າເມືອງ, ຮອງເຈົ້າເມືອງຈາກເມືອງເປົ້າໝາຍ, ຫົວໜ້າ-ຮອງຫົວໜ້າພະແນກການອ້ອມຂ້າງແຂວງ, ຜູ້ປະສານງານຂັ້ນແຂວງ ພ້ອມດ້ວຍພາກສ່ວນກ່ຽວຂ້ອງເຂົ້າຮ່ວມເປັນສັກຂີພະຍານໃນຄັ້ງນີ້ດ້ວຍ.
ພາບ ແລະ ຂ່າວໂດຍ: ພະແນກໂຄສະນາ ແລະ ຂ່າວສານ
ພິທີເປີດງານຕະຫຼາດນັດແມ່ຂອງບູຮານລາວ
ເພື່ອເປັນການສົ່ງເສີມວັດທະນາທໍາ ແລະປົກປັກຮັກສາຮີດຄອງປະເພນີອັນດີຂອງຊາດລາວໄວ້ ໃນວັນທີ 08 ກຸມພາ 2018 ນີ້, ພັດຕະຄານແມ່ຂອງ ໄດ້ຈັດພິທີເປີດຕະຫຼາດນັດແມ່ຂອງບູຮານລາວ ຂຶ້ນທີເດີ່ນ ພັດຕະຄານ. ໂດຍການເປັນປະທານຂອງ ທ່ານ ນ. ຈັນທະວອນ ປຣະວົງວຽງຄໍາ ຜູ້ອໍານວຍການພັດຕະ ຄານແມ່ຂອງ, ໃຫ້ກຽດເຂົ້າຮ່ວມໃນຄັ້ງນີ້ມີ ທ່ານຮອງລັດຖະມົນຕີ ກະຊວງກະສິກໍາ ແລະ ປ່າໄມ້, ທ່ານ ບຸນ ເມກ ວິໄລແສງ ຮອງເຈົ້າເມືອງໆ ສີສັດຕະນາກ ພ້ອມດ້ວຍແຂກຖືກເຊີນເຂົ້າຮ່ວມຢ່າງພ້ອມພຽງ.
ຈຸດປະສົງຂອງການຈັດງານ, ເພື່ອເປັນການເປີດໂອກາດ ໃຫ້ນັກທຸລະກິດຂະໜາດນ້ອຍຫາກາງໄດ້ມາ ພົບປະ ແລະ ປ່ຽນບົດຮຽນນໍາກັນ. ນອກນັ້ນ, ກໍ່ເພື່ອເປັນການປຸກລະດົມໃຫ້ຄົນຮຸ່ນໃໝ່ໄດ້ຮັບຮູ້ ແລະ ເອົາ ໃຈໃສ່ໃນການຮັກສາສິ່ງແວດລ້ອມໂດຍເນັ້ນການໃຊ້ວັດສະດຸທາງທໍາມະຊາດ. ສໍາຄັນງານຄັ້ງນີ້ຍັງເປັນການ ປະກອບສ່ວນໃນການສົ່ງເສີມປີທ່ອງທຽວລາວນໍາອີກ. ເພື່ອເຮັດໃຫ້ພິທີດັ່ງກ່າວມີຄວາມສໍາຄັນ ໃນພິທີ ທ່ານ. ຈັນທະວອນ ປຣະວົງວຽງຄໍາ ຜູ້ອໍານວຍການພັດຕະຄານແມ່ຂອງ ໄດ້ຂຶ້ນລັ່ນຄອງ ເກົ້າບາດເພື່ອເປັນສິ ລິມຸງຄຸນ ແລະ ເປີດງານຕະຫຼາດນັດແມ່ຂອງບູຮານລາວ ພ້ອມທັງເລາະທ່ຽວຊົມການວາງ ສະແດງສິນຄ້າພາຍ ໃນງານນໍາອີກ. ຊື່ງງານຕະຫຼາດນັດດັ່ງກ່າວ ມີຮ້ານຄ້າເຂົ້າຮ່ວມວາງສະແດງສິນຄ້າ ທັງໝົດ 57 ຫົວໜ່ວຍ, ປະກອບມີ: ປະເພດເຄື່ອງນຸ່ງຮົມ, ເຄື່ອງປະດັບ, ສິນຄ້າກະສິກໍາ, ເຄື່ອງຫັດຖະກໍາ ຈັກສານ, ລາຍການອາຫານ ແບບພື້ນເມືອງລາວ ແລະ ສິນຄ້າອື່ນໆ. ງານດັ່ງກ່າວໄດ້ເປີດເປັນ ເວລາ 3 ວັນ ເລີິ່ມແຕ່ວັນທີ 08 ຫາ 10 ເດືອນ ກຸມພາ 2018 ຈຶ່ງສໍາເລັດລົງ.
ພາບ ແລະ ຂ່າວໂດຍ ພະແນກຂ່າວສານ ກະສິກໍາ ແລະ ປ່າໄມ້
ພິທີເຊັນສັນຍາທຶນກູ້ຢືມ ລະຫວ່າງ ລັດຖະບານ ແຫ່ງ ສປປ ລາວ ກັບ ທະນາຄານສົ່ງອອກນໍາເຂົ້າ ສ. ຮົງກາລີ
ເພື່ອເປັນການເສີມຂະຫຍາຍວຽກງານການຮ່ວມມື ແລະ ຮັດແໜ້ນການພົວພັນ, ລະຫວ່າງ ລັດຖະບານລາວ ແລະ ລັດຖະບານ ຮົງກາລີ. ໃນຕອນບ່າຍ ຂອງວັນທີ 30 ມັງກອນ 2018 ນີ້, ໄດ້ມີພິທີເຊັນສັນຍາທຶນກູ້ຢືມ ລະຫວ່າງ ລັດຖະບານ ແຫ່ງ ສປປ ລາວກັບ ທະນາຄານສົ່ງອອກນໍາເຂົ້າ ສ. ຮົງກາລີ ຂຶ້ນທີ່ ຫ້ອງຮັບແຂກກະຊວງການເງິນ. ໃຫ້ກຽດເປັນປະທານໂດຍ ທ່ານ ນ. ທິບພະກອນ ຈັນທະວົງສາ ຮອງລັດຖະມົນຕີ ກະຊວງການເງິນ, ທ່ານ ນ. ຊິນເວຍ ເນເມດິ-ວາກາ ຮອງຜູ້ອໍານວຍການ ທະນາຄານສົ່ງອອກນໍາເຂົ້າ ສ. ຮົງກາລີ. ພ້ອມນີ້, ມີຮອງລັດຖະມົນຕີ ຈາກກະຊວງກະສິກໍາ ແລະ ປ່າໄມ້, ກະຊວງປ້ອງກັນຄວາມສະຫງົບ, ຮອງເຈົ້າຄອນນະຄອນຫຼວງ ພ້ອມດ້ວຍພາກສ່ວນກ່ຽວຂ້ອງເຂົ້າຮ່ວມ.
ຈຸດປະສົງເຊັນສັນຍາໃນຄັ້ງນີ໊ ເພື່ອເປັນການສືບຕໍ່ໃຫ້ການຊ່ວຍເຫຼືອເປັນຄັ້ງທີ 3 ມູນຄ່າ 160 ລ້ານໂດລາສະຫາລັດ, ປະກອບມີ 3 ໂຄງການຄື: 1, ໂຄງການ ຄຸ້ມຄອງພົນລະເມືອງທັນສະໄໝ ມີມູນຄ່າ 25 ລ້ານໂດລາສະຫາລັດ ໂດຍກະຊວງປ້ອງກັນຄວາມສະຫງົບ ເປັນຜູ້ຄຸ້ມຄອງການຈັດຕັ້ງປະຕິບັດ ເພື່ອຂະຫຍາຍຖານຂໍ້ມູນການຄຸ້ມຄອງສໍາມະໂນຄົວ ແລະບັດປະຈໍາຕົວພົນລະເມືອງ 18 ແຂວງໃນທົ່ວປະເທດ. 2, ໂຄງການພັດທະນາໂຄງລ່າງພື້ນຖານກະສິກໍາ ມູນຄ່າ 35 ລ້ານໂດລາສະຫາລັດ, ໂດຍກະຊວງກະສິກໍາ ແລະ ປ່າໄມ້ ເປັນຜູ້ຄຸ້ມຄອງໃນການຈັດຕັ້ງປະຕິບັດ ໂດຍຈະໄດ້ດໍາເນີນຢູ່ 6 ແຂວງຄື: ນະຄອນຫຼວງວຽງຈັນ, ຫຼວງພະບາງ, ວຽງຈັນ, ໄຊສົມບູນ ໄຊຍະບູລີ ແລະ ແຂວງຊຽງຂວາງ ໂດຍເນັ້ນໃສ່ກິດຈະກໍາ ການປັບປຸງການຄຸ້ມຄອງດິນ, ການປູກພືດ, ສົ່ງເສີມພັດທະນາການລ້ຽງສັດທີ່ເປັນທ່າແຮງ ແລະວຽກງານອື່ນ ທີ່ນອນຢູ່ໃນເງື່ອນໄຂຂອງໂຄງການ. 3 ໂຄງການບໍາບັດນໍ້າເປື້ອນແບບລວມສູນ ມູນຄ່າ 100 ລ້ານໂດລາສະຫາລັດ ໂດຍນະຄອນຫຼວງ ເປັນຜູ້ຄຸ້ມຄອງການຈັດຕັ້ງປະຕິບັດ ເພື່ອກໍ່ສ້າງໂຄງລ່າງພື້ນຖານ ແລະໂຮງງານບໍາບັດນໍ້າເປື້ອນ ເພື່ອກັ່ນຕອງນໍ້າເປື້ອນ ທີ່ບັນດາຄົວເຮືອນ, ໂຮງງານ ປ່ອຍລົງສູ່ຮ່ອງນໍ້າ ກ່ອນຈະໄຫຼ່ລົງສູ່ຮ່ອງນໍ້າທໍາມະຊາດ ໃຫ້ມີຄຸນນະພາບດີກວ່າເກົ່າ, ຫຼຸດຜ່ອນສານເຄມີ ແລະສິ່ງເປິເປື້ອນອື່ນໆ.
ເພື່ອເຮັດພິທີດັ່ງກ່າວມີຄວາມໝາຍສໍາຄັນ ໄດ້ມີພິທີເຊັນສັນຍາທຶນກູ້ຢືມດັ່ງກ່າວ ໃຫ້ກຽດເຊັນໂດຍ ທ່ານ ນ. ທິບພະກອນ ຈັນທະວົງສາ ຮອງລັດຖະມົນຕີ ກະຊວງການເງິນ, ທ່ານ ນ. ຊິນເວຍ ເນເມດິ-ວາກາ ຮອງຜູ້ອໍານວຍການ ທະນາຄານສົ່ງອອກນໍາເຂົ້າ ສ. ຮົງກາລີ ແລະ ທ່ານ ກາໂບ ຊ໋ອກ ຜູ້ປະສານງານອຳນວຍຄວາມສະດວກຂະແໜງຜູ້ປະກອບການສຳລັບທະນະຄານໂລກ, ຫ້ອງການອົງການຈັດຕັ້ງສາກົນ ແລະ ພົວພັນຕ່າງປະເທດ ໂດຍຊ່ອງໜ້າຜູ້ເຂົ້າຮ່ວມເປັນສັກຂີພິຍານ.
ຂ່າວໂດຍ : ສອນເພັດ ສຸລິພອນ
ກວດແກ້ໂດຍ: ທ່ານ ນ. ປ້ອມ ພັນທະວົງ
ທ່ານ ຮອງລັດຖະມົນຕີກະຊວງກະສິກຳ ສປ ຈີນ ພ້ອມດ້ວຍຄະນະເຂົ້າຢ້ຽມຂໍານັບ ທ່ານ ຮອງນາຍົກລັດຖະມົນຕີ ແຫ່ງ ສປປ ລາວ.
ໃນວັນທີ 24 ມັງກອນ 2018 ທີ່ຜ່ານມາ ທ່ານ ອູຊີງຫຼົງ ຮອງລັດຖະມົນຕີ ກະຊວງກະສິກຳ ສປ ຈີນ ພ້ອມດ້ວຍຄະນະເຂົ້າຢ້ຽມຂໍານັບ ທ່ານ ສົມດີ ດວງດີ ຮອງນາຍົກລັດຖະມົນຕີ ແຫ່ງສປປ ລາວ ການເຂົ້າຢ້ຽມໃນຄັ້ງນີ້ທັງ 2 ຝ່າຍໄດ້ໂອ້ລົມກ່ຽວກັບການພັດທະນາການຮ່ວມມືທາງດ້ານວຽກງານກະສິກຳ ແລະ ປ່າໄມ້ ເຊີ່ງທ່ານ ອູຊີງຫຼົງ ໄດ້ສະແດງຄວາມຮູ້ສຶກເປັນກຽດຢ່າງຍິ່ງທີ່ໄດ້ເຂົ້າພົບປະໃນຄັ້ງນີ້ ສປ ຈີນ ເປັນປະເທດນື່ງທີ່ມີຕະຫຼາດກ້ວາງໃຫຍ່ ແລະ ສປປ ລາວ ແມ່ນມີຊັບພະຍາກອນທີ່ຫຼວງຫຼາຍສາມາດຮ່ວມມືພາຍໃຕ້ກອບຕ່າງຝ່າຍຕ່າງໄດ້ຮັບຜົນປະໂຫຍດ. ທ່ານ ຮອງນາຍົກລັດຖະມົນຕີແຫ່ງ ສປປ ລາວ ໄດ້ໂອ້ລົມເຖີງການຮ່ວມມື2ຝ່າຍໃນການພັດທະນາພື້ນຖານໂຄງລ່າງເຊັ່ນ: ສືບຕໍ່ໃຫ້ການຊ່ວຍເຫລືອການສ້າງທາງລົດໄຟຄວາມໄວສູງ ແລະ ໃຫ້ການຊ່ວຍເຫຼືອສ້ອມແປງເສັ້ນທາງເຂົ້າສູ່ເຂດການຜະລິດກະສິກຳ ຂອງຊາວກະສິກອນ, ເພື່ອເຮັດໃຫ້ຜົນຜະລິດຂອງຊາວກະສິກອນອອກສູ່ຕະຫຼາດໄດ້ຫຼາຍ ສາມາດສ້າງລາຍຮັບໃຫ້ແກ່ຄອບຄົວເພີ້ມຂື້ນ ແລະ ສືບຕໍ່ໃຫ້ການຊ່ວຍເຫຼືອທາງດ້ານເຕັກນິກວິຊາການທີ່ທັນສະໄໝ ໃນການປູກ-ການລ້ຽງ ໂດຍສະເພາະການປູກພືດ, ຜັກ ທີ່ປອດສານພິດ ແລະ ການຮ່ວມມືໃນຫຼາຍໆດ້ານ ບົນພື້ນຖານການຜັນຂະຫຍາຍສາຍພົວພັນທີ່ເປັນມູນເຊື້ອ ບົນຈິດໃຈຄູ່ຮ່ວມມືແບບເພື່ອນມິດຍຸດທະສາດຮອບດ້ານຍາວນານເຊີ່ງກັນ ແລະ ກັນ ຮັບປະກັນ 4 ດີ(ເພື່ອນບ້ານທີ່ດີ, ເພື່ອນມິດທີ່ດີ, ສະຫາຍທີ່ດີ ແລະ ຄູ່ຮ່ວມຍຸດທະສາດທີ່ດີ)ລະຫວ່າງສອງລັດຖະບານ ສປປ ລາວ ແລະ ສປ ຈີນ.
ຂຽນໂດຍ: ທ. ອາລົງກອນ ສຸວັນນະສຸກ
ກວດແກ້ໂດຍ: ທ່ານ ເຂັມພອນ ທິພົມມະຈັນ
ລັດຖະມົນຕີ ກະຊວງກະສິກໍາ ແລະປ່າໄມ້ ຕ້ອນຮັບຄະນະຜູ້ແທນ ສປຈີນ
ເພື່ອເປັນການເສີມຂະຫຍາຍສາຍພົວພັນ ທີ່ເປັນມູນເຊື້ອບົນຈິດໃຈຄູ່ຮ່ວມມືແບບເພື່ອນມິດຍຸດທະສາດຮອບດ້ານ, ຍາວນານ ແລະຮັບປະກັນ 4 ດີຄື: ເພື່ອນບ້ານທີ່ດີ, ເພື່ອນມິດທີ່ດີ, ສະຫາຍທີ່ດີ ແລະຄູ່ຮ່ວມຍຸດທະສາດທີ່ດີ ລະຫວ່າງສອງລັດຖະບານ ສປປ ລາວ ແລະ ສປ ຈີນ. ໃນຕອນຄໍ່າວັນທີ 23 ມັງກອນ 2018 ຢູ່ທີ່ ໂຮງແຮມແລນມາກ, ນະຄອນຫຼວງວຽງຈັນ ທ່ານ ປອ. ລຽນ ທີແກ້ວ ລັດຖະມົນຕີ ກະຊວງກະສິກໍາ ແລະ ປ່າໄມ້ ໄດ້ໃຫ້ກຽດຕ້ອນຮັບການເຂົ້າພົບປະຂອງ ທ່ານ ອູຊີງຫຼົງ ຮອງລັດຖະມົນຕີ ກະຊວງກະສິກໍາ ສປ ຈີນ ໂດຍມີຄະນະພັກ, ຄະນະນໍາ ຈາກສອງກະຊວງເຂົ້າຮ່ວມ.
ໂອກາດນີ້, ທ່ານ ປອ. ລຽນ ທີແກ້ວ ລັດຖະມົນຕີ ກະຊວງກະສິກໍາ ແລະ ປ່າໄມ້ ໄດ້ຕີລາຄາສູງຕໍ່ກັບວຽກງານການຮ່ວມມືໃນຂະແໜງການກະສິກໍາ ແລະປ່າໄມ້ ໃນໄລຍະຜ່ານມາ ແລະ ສະແດງຄວາມຍ້ອງຍໍຊົມເຊີຍຕໍ່ການເຂົ້າມາຊ່ວຍເຫຼືອລ້າ ໃນດ້ານຕ່າງໆ ຂອງລັດຖະບານ ສປ ຈີນ ໂດຍສະເພາະແມ່ນການຊ່ວຍ ເຫຼືອໃນຂະແໜງການກະສິກໍາ ແລະປ່າໄມ້ ລວມທັງການເຂົ້າມາລົງທຶນທຸລະກິດ ຊື່ງເຫັນໄດ້ວ່າມີບາດກ້າວທີ່ຂະຫຍາຍຕົວໄປໃນທາງທີ່ດີ. ພ້ອມນີ້, ທ່ານ ລັດ ຖະມົນຕີ ຍັງໄດ້ສະເໜີພາກສ່ວນທີ່ກ່ຽວຂ້ອງ ຂອງກະຊວງກະສິກໍາ ສປ ຈີນ ສືບຕໍ່ໃຫ້ການຊ່ວຍເຫຼືອ ທາງດ້ານເຕັກນິກວິຊາການ, ຜູ້ຊ່ຽວຊານດ້ານກະສິກໍາ ທັງເປັນການຊຸກຍູ້ສົ່ງເສີມໃຫ້ປະຊາຊົນສອງຊາດໃຫ້ໄດ້ຮັບອາຫານທີ່ດີຕໍ່ສຸຂະພາບ ແລະມີສຸຂະອະນາໄມທີ່ດີ ນໍາອີກ. ພ້ອມນີ້, ທ່ານ ອູຊີງຫຼົງ ຮອງລັດຖະ ມົນຕີ ກະຊວງກະສິກໍາ ສປ ຈີນ ໄດ້ສະແດງຄວາມຊື່ນຊົມຍິນດີ ທີ່ການນໍາຂອງລາວ ໄດ້ອໍານວຍຄວາມສະດວກໃນການເຂົ້າມາລົງທຶນ ຂອງນັກທຸລະກິດຈາກ ສປ ຈີນ ແລະ ຍິນດີສືບຕໍ່ວຽກງານດັ່ງກ່າວໃຫ້ມີການຂະຫຍາຍຕົວ ຢ່າງກວ້າງຂວາງໃນຕໍ່ໜ້າ.
ເພື່ອເຮັດໃຫ້ການພົບປະກັນໃນຄັ້ງນີ້, ມີຄວາມໝາຍສໍາຄັນ ການນໍາທັງສອງຝ່າຍ ໄດ້ຈັດພິທີເຊັນບົດບັນທຶກຄວາມເຂົ້າໃຈ ກ່ຽວກັບການຮ່ວມມືວຽກງານປ້ອງກັນພືດ. ຕາງໜ້າຝ່າຍລາວເຊັນໂດຍ ທ່ານ ປອ. ພວງປາຣິສັກ ປຣະວົງວຽງຄໍາ ຮອງລັດຖະມົນຕີ ກະຊວງກະສິກໍາ ແລະ ປ່າໄມ້ ແລະ ຝ່າຍຈີນ ເຊັນໂດຍ ທ່ານ ອູຊີງຫຼົງ ຮອງລັດຖະມົນຕີ ກະຊວງກະສິກໍາ ສປ ຈີນ. ໂດຍຊ້ອງໜ້າຄະນະພັກ, ຄະນະນໍາທັງສອງຝ່າຍເປັນສັກຂີພິຍານ. ຈາກນັ້ນ, ໄດ້ເປີດປ້າຍ ຫ້ອງ ການໂຄງການ ເພື່ອສ້າງຕັ້ງສວນພັດທະນາອຸດສາຫະກໍາ-ກະສິກໍາທັນສະໄໝ ນໍາອີກ.
ຂ່າວໂດຍ : ສອນເພັດ ສຸລິພອນ
ກວດແກ້ຂ່າວໂດຍ :. ທ່ານ ຂັນຄໍາ ອ້ວນອູດົມ
ກອງປະຊຸມພົບປະ 2 ຝ່າຍ ລາວ-ຈີນ ວ່າດ້ວຍການຮ່ວມມືດ້ານກະສິກໍາ
ເພື່ອເປັນການທົບທວນຄືນການຮ່ວມມືສອງຝ່າຍດ້ານກະສິກໍາ ລະຫວ່າງ ລາວ ແລະ ສປຈີນ. ໃນວັນທີ 23 ມັງກອນ ຜ່ານມາ, ກະຊວງກະສິກໍາ ແລະປ່າໄມ້ ສປປລາວ ຮ່ວມກັບ ກະຊວງກະສິກໍາ ສປຈີນ ໄດ້ຈັດກອງປະຊຸມພົບປະ 2 ຝ່າຍ ລາວ-ຈີນ ວ່າດ້ວຍການຮ່ວມມືດ້ານກະສິກໍາ ຂຶ້ນທີ່ຫ້ອງປະຊຸມ ໂຮງແຮມແລນມາກ, ນະຄອນຫຼວງວຽງຈັນ. ໃຫ້ກຽດເປັນປະທານໂດຍ ທ່ານ ຄໍາບຸນນັດ ໄຊຍະນົນ ຮອງລັດຖະມົນຕີ ກະຊວງກະສິກໍາ ແລະ ປ່າໄມ້, ທ່ານ ອູຊີງຫຼົງ ຮອງລັດຖະມົນຕີ ກະຊວງກະສິກໍາ ສປ ຈີນ. ພ້ອມນີ້ມີ ຜູ້ແທນທັງສອງຝ່າຍເຂົ້າຮ່ວມຢ່າງພ້ອມພຽງ.
ຈຸດປະສົງ ຂອງກອງປະຊຸມພົບປະ 2 ຝ່າຍໃນຄັ້ງນີ້ ເພື່ອເປັນການສະຫຼຸບ, ຕີລາຄາຄືນການຈັດຕັ້ງປະຕິບັດວຽກງານການຮ່ວມມືໃນໄລຍະຜ່ານມາ ຂອງສອງລັດຖະບານ ໂດຍສະເພາະແມ່ນການຮ່ວມມືໃນຂະແໜງການກະສິກໍາ ແລະ ປ່າໄມ້. ຊື່ງຜ່ານມາ, ລັດຖະບານ ສປ ຈີນ ໄດ້ເອົາໃຈໃສ່ສະໜັບສະໜູນ ແລະໃຫ້ການຊ່ວຍເຫຼືອທາງດ້ານທຶນຮອນ ແລະວິຊາການໃຫ້ແກ່ຂະແໜງການກະສິກໍາ ແລະ ປ່າໄມ້ ສປປ ລາວ ຊື່ງສະແດງອອກບັນດາໂຄງການຕ່າງໆເຊັ່ນ: ໂຄງການສ້າງສູນສາທິດ ແລະບໍລິການເຕັກນິກກະສິກໍາຮ່ວມມືລາວ-ຈີນ ມີມູນຄ່າ 41,9 ລ້ານຢວນ ແລະ ໂຄງການສ້າງໂຮງງານຜະລິດຫົວອາຫານສັດ ມູນຄ່າ 5.250.000 ໂດລາ ທີ່ແຂວງອຸດົມໄຊ, ສ້າງສູນເຝົ້າລະວັງ ແລະຄວບຄຸມພະຍາດສັດຂ້າມຊາຍແດນ ຢູ່ນະຄອນຫຼວງວຽງຈັນ, ຫຼວງນໍ້າທາ ແລະ ຜົ້ງສາລີ ມູນຄ່າ 39.060.000 ຢວນ, ໂຄງການສ້າງຕົວແບບບ້ານຊົນນະບົດໃໝ່ ຢູ່ເມືອງສັງທອງ ນະຄອນຫຼວງວຽງຈັນ ແລະ ແຂວງຫຼວງພະບາງ ດ້ວຍມູນຄ່າ 33 ລ້ານຢວນ. ນອກນີ້, ຍັງໄດ້ຮ່ວມມືກັບບໍລິສັດຊວນເຢ ໂຄງການຜະລິດເຂົ້າສະອາດສົ່ງໄປ ສປ ຈີນ ຢູ່ແຂວງສະຫວັນນະເຂດ. ໃນທີ່ປະຊຸມ, ຜູ້ແທນທັງສອງຝ່າຍ, ຍັງໄດ້ປຶກສາຫາລືແນວທາງ ເພື່ອສືບຕໍ່ວຽກງານການຮ່ວມມືໃນຕໍ່ໜ້າ.
ຂ່າວໂດຍ : ສອນເພັດ ສຸລິພອນ
ກວດແກ້ຂ່າວໂດຍ: ທ່ານ ນ. ປ້ອມ ພັນທະວົງ
ມົງໂກລີ ປະດັບຫຼຽນໃຫ້ບຸກຄົນທີ່ມີຜົນງານດີເດັ່ນ
ໃນຕອນຄໍາ ວັນທີ 21 ມັງກອນ ຜ່ານມາ, ກະຊວງກະສິກໍາ ແລະ ປ່າໄມ້ ໄດ້່ຈັດພິທີປະດັບຫຼຽນໄຊ-ຫຼຽນກາໃຫ້ແກ່ບຸກຄົນທີ່ມີຜົນງານປະກອບສ່ວນເສີມສ້າງສາຍພົວພັນມິດຕະພາບ ແລະ ການຮ່ວມມື ລະຫວ່າງ ລາວ ແລະ ມົງໂກລີ ຢູ່ພັດຕະຄານແມ່ຂອງ 1, ນະຄອນຫຼວງວຽງຈັນ ໃຫ້ກຽດເຂົ້າຮ່ວມໂດຍທ່ານ ປອ. ລຽນ ທິແກ້ວ ລັດຖະມົນຕີ ກະຊວງກະສິກໍາ ແລະ ປ່າໄມ້, ທ່ານ ນາງ ຈານິມຄານ ຊາອູເລ ຮອງລັດຖະມົນຕີ ກະຊວງສະບຽງອາຫານ ກະສິກໍາ ແລະ ອຸດສາຫະກໍາເບົາ ມົງໂກລີ ພ້ອມດ້ວຍບັນດາຄະນະນໍາຈາກກະຊວງກະສິກໍາ ແລະປ່າໄມ້ ແລະ ກະຊວງປ້ອງກັນປະເທດ, ທູດມົງໂກລີປະຈໍາ ສປປ ລາວ ຕະຫຼອດຮອດພະນັກງານວິຊາການທີ່ກ່ຽວຂ້ອງເຂົ້າຮ່ວມ.
ທ່ານ ລ. ກາລບັດຣັກ ເອກອັກຄະລັດຖະທູດ ມົງໂກລີປະຈໍາລາວ ໄດ້ຂຶ້ນຜ່ານບົດບັນຍັດວັກທີ 7 ຂໍ້ທີ 1 ມາດຕາທີ 33 ຂອງລັດຖະທໍາມະນູນ ແຫ່ງ ມົງໂກລີ ແລະ ຂໍ້ທີ 1 ມາດຕາທີ 15 ຂອງກົດໝາຍວ່າດ້ວຍປະທານາທິບໍດີ ແຫ່ງ ມົງໂກລີ ແລະ ເນື່ອງໃນໂອກາດ ຄົບຮອບ 55 ປີ ແຫ່ງການສ້າງຕັ້ງສາຍພົວພັນທາງການທູດລະຫວ່າງ ມົງໂກລີ ແລະ ລາວ ເພື່ອເປັນການຕີລາຄາສູງຕໍ່ຄວາມພະຍາຍາມ ແລະ ການປະກອບສ່ວນໃນການເສີມຂະຫຍາຍຮັດແໜ້ນສາຍພົວພັນ ແລະ ການຮ່ວມມືລະຫວ່າງສອງປະເທດ ຈຶ່ງໄດ້ຕົງລົງຍ້ອງຍໍຫຼຽນໄຊແຫ່ງລັດ, ແຫ່ງມົງໂກລີ ຍ້ອງຍໍຫຼຽນໄຊດາວພະສຸກ ແກ່ທ່ານ ບຸນຂວາງ ຄໍາບຸນເຮືອງ ຮອງລັດຖະມົນຕີກະຊວງກະສິກໍາ ແລະ ປ່າໄມ້, ປະທານສະມາຄົມມິດຕະພາບລາວມົງໂກລີ. ທ່ານ ຄໍາໄສ ສີສະຫວັດ ຜູ້ແປພາສາ ເລຂານຸການປະຈໍາສະຖານເອກອັກຄະລັດຖະທູດ ແຫ່ງ ມົງໂກລີ ປະຈໍາ ສປປ ລາວ ແລະ ຍ້ອງຍໍຫຼຽນໄຊມິດຕະພາບ ແກ່ທ່ານ ສຸກຖາວອນ ແກ້ວລາ ອາດີເອກອັກຄະລັດຖະທູດ ສປປ ລາວ ຜູ້ທໍາອິດທີ່ປະຈໍາຢູ່ມົງໂກລີ ອາດີດຫົວໜ້າກົມປະຈໍາຄະນະພົວພັນຕ່າງປະເທດສູນກາງພັກ ແລະ ກະຊວງການຕ່າງປະເທດ ທ່ານ ພັນດວງຈິດ ວົງສາ ອາດີດປະທານສູນກາງແນວລາວສ້າງຊາດ ອະດີດປະທານສະມາຄົມມິດຕະພາບລາວ-ມົງໂກລີ. ໃຫ້ກຽດຂຶ້ນປະດັບຫຼຽນໂດຍທ່ານ ນາງ ຈານິມຄານ ຊາອູເລ ຮອງລັດຖະມົນຕີ ກະຊວງສະບຽງອາຫານ ກະສິກໍາ ແລະ ອຸດສາຫະກໍາເບົາ ມົງໂກລີ ແລະ ທ່ານ ລ ກາລບັດຣັກ ເອກອັກຄະລັດຖະທູດ ມົງໂກລີ ປະຈໍາລາວ.
ຂ່າວໂດຍ: ສອນເພັດ ສຸລິພອນ
ກວດແກ້ໂດຍ: ທ່ານ ເຂັມພອນ ທິພົມມະຈັນ
