ກອງປະຊຸມຄັ້ງປະຖົມມະລຶກ ໂຄງການສ້າງຕັ້ງສູນຝຶກອົບຮົມ ຮ່ວມມື ລາວ-ສ.ເກົາຫຼີ ດ້ານຊົນລະປະທານ
ໂຄງການສ້າງຕັ້ງສູນຝຶກອົບຮົມ ຮ່ວມມື ລາວ-ສ.ເກົາຫຼີ ດ້ານຊົນນະບົດ ເປັນໂຄງການໜຶ່ງທີ່ມີຄວາມໝາຍຄວາມສຳຄັນ ໃນການເສີມຂະຫຍາຍຄວາມຮູ້ຄວາມສາມາດ ໃຫ້ພະນັກງານວິຊາການຂອງຂະແໜງພັດທະນາຊັບພະຍາກອນນ້ຳ, ຊົນລະປະທານ ແລະ ການຄວບຄຸມກວດກາຄຸນນະພາບການກໍ່ສ້າງພື້ນຖານໂຄງລ່າງຊົນລະປະທານ ທັງພາກລັດ ແລະ ເອກະຊົນຫັນເປັນທັນສະໄໝ ເປັນວຽກງານໜຶ່ງທີ່ປະກອບສ່ວນເຂົ້າໃນການຈັດຕັ້ງຜັນຂະຫຍາຍ ຍຸດທະສາດພັດທະນາກະ ສິກໍາ ຮອດປີ 2025 ແລະ ວິໃສທັດຮອດປີ 2030 ເວົ້າລວມ, ເວົ້າສະເພາະແມ່ນ ແຜນງານການສ້າງຄວາມເຂັ້ມແຂງ ໃຫ້ແກ່ຂະແໜງການຊົນລະປະທານ.
ໂຄງການດັ່ງກ່າວ ເປັນທຶນຊ່ວຍເຫຼືອລ້າຈາກກະຊວງກະສິກຳ, ອາຫານ ແລະ ກິດຈະການຊົນນະບົດ ສ. ເກົາຫຼີ ໃນມູນຄ່າ 4,75 ລ້ານໂດລາສະຫະລັດ, ໄລຍະເວລາການຈັດຕັ້ງປະຕິບັດໂຄງການແມ່ນ 5 ປີ (2021-2026) ແລະ ໄດ້ຮັບການຊ່ວຍເຫຼືອທາງດ້ານວິຊາການຈາກ ສ.ເກົາຫຼີ ໂດຍແມ່ນລັດວິສາຫະພັດທະນາຊຸມຊົນ ສ.ເກົາຫຼີ.
ໃນວັນທີ 11 ກຸມພາ 2022, ກົມຊົນລະປະທານ, ກະຊວງກະສິກຳ ແລະ ປ່າໄມ້ ໄດ້ຈັດກອງປະຊຸມຄັ້ງປະຖົມມະລຶກຂຶ້ນ, ທີ່ໂຮງແຮມລາວພຣາຊາ. ໂດຍການເປັນປະທານຮ່ວມຂອງ ທ່ານ ທອງພັດ ວົງມະນີ ຮອງລັດຖະມົນຕີກະຊວງກະສິກຳ ແລະ ປ່າໄມ້, ທ່ານ ດຣ ຢ໋ອງ ອິ ໂຮ ຫົວໜ້າຫ້ອງການລັດວິສາຫະກິດຊຸມຊົນ-ຊົນນະບົດ ສ.ເກົາຫຼີ ປະຈຳລາວ. ຊຶ່ງມີທ່ານຫົວໜ້າ-ຮອງຫົວໜ້າກົມ, ທ່ານຫົວໜ້າ-ຮອງຫົວໜ້າພະແນກ, ພາກສ່ວນທີ່ກ່ຽວຂ້ອງຂອງຝ່າຍ ລາວ, ຝ່າຍ ສ.ເກົາຫຼີ ແລະ ແຂກຖືກເຊີນເຂົ້າຮ່ວມ.
ໃນທີ່ປະຊຸມ ທ່ານ ທອງພັດ ວົງມະນີ ຮອງລັດຖະມົນຕີກະຊວງກະສິກຳ ແລະ ປ່າໄມ້ ໄດ້ກ່າວວ່າ: ຈຸດປະສົງຂອງໂຄງການເພື່ອສ້າງຄວາມເຂັ້ມແຂງ ແລະ ຂີດຄວາມສາມາດຂອງບຸກຄະລາກອນຂະແໜງ ການຊົນລະປະທານ ຜ່ານການຝຶກອົບຮົມເຕັກໂນໂລຊີຊົນລະປະທານ ແລະ ການພັດທະນາຊັບພະຍາກອນແຫຼ່ງນໍ້າ; ນໍາສະເໜີຄວາມຮູ້ດ້ານເຕັກໂນໂລຊີຊົນລະປະທານສະໄໝໃຫມ່ ໃຫ້ແກ່ພະນັກງານຂະແໜງການຊົນລະປະທານ ຂັ້ນສູນກາງ ແລະ ທ້ອງຖິ່ນ, ນັກວິສະວະ ກອນອິດສະຫຼະ ແລະ ຜູ້ປະກອບການທີ່ກ່ຽວຂ້ອງກັບຂະແໜງການຊົນລະປະທານ; ແລກປ່ຽນຄວາມຮູ້ເຕັກໂນໂລຊີລະ ຫວ່າງ ສ.ປ.ປ ລາວ ແລະ ສ.ເກົາຫຼີ. ກິດຈະກຳຫຼັກຂອງໂຄງການປະກອບດ້ວຍ: ສ້າງອາຄານເພື່ອອໍານວຍຄວາມສະດວກໃຫ້ແກ່ການຝຶກອົບຮົມ; ສ້າງປື້ມຄູ່ມື; ປັບປຸງອຸປະກອນການວິໄຈຄຸນນະພາບນໍ້າ ແລະ ວິໄຈດິນ; ຈັດຕັ້ງການຝຶກອົບຮົມໃຫ້ແກ່ຂະແຫນງຊົນລະປະທານ ຂັ້ນສູນກາງ ແລະ ທ້ອງຖິ່ນ, ນັກວິສະວະກອນ ອິດສະຫຼະ ແລະ ຜູ້ປະກອບການທີ່ກ່ຽວຂ້ອງກັບຂະແໜງການຊົນລະປະທານ. ຫຼັງຈາກນັ້ນ, ໃນທີ່ປະຊຸມຍັງໄດ້ຮັບຟັງການນຳສະເໜີພາບລວມການເຮັດວຽກຂອງໂຄງການ; ວິທີການກໍ່ສ້າງໂຄງການ; ແຜນສ້າງຂີດຄວາມສາມາດ ແລະ ວຽກງານການປົກປ້ອງສິດຜົນປະໂຫຍດສັງຄົມ.
