ການສ້າງແຜນທີ່ດິນ ສຳລັບ ສາທາລະນະລັດ ປະຊາທິປະໄຕ ປະຊາຊົນລາວ
ກົມຄຸູ້ມຄອງ ແລະ ພັດທະນາທີ່ດິນກະສິກຳ, ກະຊວງກະສິກຳ ແລະ ປ່າໄມ້ ໂດຍຜ່ານໂຄງການສ້າງຄວາມ ເຂັ້ມແຂງລະບົບຕິດຕາມ ແລະ ຂໍ້ມູນຂ່າວສານອຸຕຸກະເສດ (SAMIS) ເພື່ອປັບປຸງຄວາມສາມາດການປັບໂຕ ຕໍ່ ການປ່ຽນແປງພູມອາກາດ ແລະ ການຄ້ຳປະກັນສະບຽງອາຫານຂອງ ສປປ ລາວ ແມ່ນໄດ້ສ້າງແຜນທີ່ຊະນິດດິນ ໂດຍການເກັບຕົວຢ່າງດິນທົ່ວທົ່ວປະເທດ ແລະ ຄົ້ນຄ້ວາທົບທວນບັນດາຂໍ້ມູນທີ່ກ່ຽວຂ້ອງ ເຂົ້າໃນການຈັດປະເພດດິນ ຕາມລະບົບມາດຖານປະເພດດິນສາກົນ (WRB) ປີ 2014.
ໂດຍທົ່ວໄປແລ້ວການສ້າງແຜນທີ່ດິນ ແມ່ນຂະບວນການພັນລະນາ ຄຸນລັກສະນະທາງທໍາມະຊາດຂອງດິນ, ການຈຳແນກ ແລະ ການຈັດແບ່ງປະເພດ, ການຈັດກຸ່ມຂອງດິນ ເຊິ່ງຖືກກຳນົດອອກເປັນຫົວໜ່ວຍແຜນທີ່ ແລະ ການສັງລວມຂໍ້ມູນຄຸນລັກສະນະຂອງດິນ ເພື່ອການຕີຄວາມໝາຍ ແລະ ອະທິບາຍກ່ຽວກັບການກະແຈກກະຈາຍຂອງດິນຢູ່ຕາມແຜນທີ່ໃດໜຶ່ງ. ເຊິ່ງມັນໄດ້ດຳເນີນການສ້າງມາຈາກ 5 ໄລຍະຂອງໜ້າວຽກຄື:
- ວຽກງານການກະກຽມປະກອບມີ: ການຕີຄວາມໝາຍເບື້ອງຕົ້ນ ກ່ຽວກັບຫົວຫນ່ວຍທາງພູມສາດ ໂດຍອະທິບາຍເຖິງພູມສາດ, ການນໍາໃຊ້ທີ່ດິນ, ແຜນທີ່ປົກຫຸ້ມໜ້າດິນ ແລະ ຂໍ້ມູນຈາກດາວທຽມ;
- ວຽກງານພາກສະໜາມ ຫຼື ສຳຫຼວດດິນ, ການເກັບຕົວຢ່າງດິນ ແລະ ອະທິບາຍເຖິງຮູບຮ່າງລັກສະນະຂອງດິນ ເຊິ່ງປົກກະຕິມັກຈະຈັດຂື້ນໂດຍກຸ່ມຜູ້ຊ່ຽວຊານ ຫລັງຈາກຂຸດດິນຂຶ້ນມາວິເຄາະ.
- ປະຕິບັດການຢູ່ຫ້ອງທົດລອງ ແລະ ການວິເຄາະວິໄຈດິນ, ໂດຍທົ່ວໄປແລ້ວຢ່າງໜ້ອຍຕ້ອງປະກອບມີ: ການວິເຄາະທາງກາຍະພາບ ແລະ ເຄມີຂອງດິນ;
- ການຈັດປະເພດດິນ ພ້ອມທັງໃຫ້ນິຍາມຂອງກຸ່ມດິນ ແລະ ຫົວໜ່ວຍດິນ;
- ການກະກຽມແຜນທີ່ສຸດທ້າຍ ໂດຍມີການຈໍາແນກປະເພດ ແລະ ການຈັດແບ່ງກຸ່ມ ໂດຍແຍກອອກເປັນຫົວໜ່ວຍແຜນທີ່.
ປົກກະຕິແລ້ວ, ແຜນທີ່ດິນສວນໃຫ່ຍ ແມ່ນໄດ້ຮັບການຊົມໃຊ້ໂດຍຜູ້ຊ່ຽວຊານ ຂອງກົມປູກຝັງ, ກົມປ່າໄມ້, ກົມຊົນລະປະທານ, ກົມແຜນການ ແລະ ການເງິນ, ກົມລ້ຽງສັດ ແລະ ການປະມົງ, ກົມນະໂຍບາຍ ແລະ ນິຕິກຳ, ກົມສົ່ງເສີມເຕັກນິກ ແລະ ປຸງແຕ່ງກະສິກຳ, ສະຖາບັນຄົ້ນຄ້ວາກະສິກໍາ, ປ່າໄມ້ ແລະ ພັດທະນາຊົນນະບົດ, ໂດຍສະເພາະສູນສະຖິຕິກະສິກກໍາ, ກະຊວງກະສິກໍາ ແລະ ປ່າໄມ້. ຕະຫຼອດຮອດກົມທີ່ດິນ, ກະຊວງຊັບພະຍາກອນທໍາມະຊາດ ແລະ ສິ່ງແວດລ້ອມ.
ຫ້ອງການກະສິກໍາ ແລະ ປ່າໄມ້ເມືອງ, ຫ້ອງການຊັບພະຍາກອນທຳມະຊາດ ແລະ ສິ່ງແວດລ້ອມເມືອງ ແລະ ບັນດາໜ່ວຍງານອື່ນໆທີ່ກ່ຽວຂ້ອງກັບຊາວກະສິກອນ ຕະຫຼອດຮອດສະຖາບັນມະຫາວິທະຍາໄລ ແລະ ວິທະຍາໄລຕ່າງ ເຊິ່ງຄາດວ່າເປັນຜູ້ໄດ້ຮັບຜົນປະໂຫຍດຈາກຂໍ້ມູນ ທີ່ໄດ້ນຳມາສະເໜີໄວ້ໃນແຜນທີ່ດັ່ງກ່າວ ເພື່ອວັດຖຸປະສົງດ້ານ ການວິໃຈ ແລະ ການສຶກສາ.
ເຖິງຢ່າງໃດກໍ່ດີ, ນັກສຶກສາ ຫລື ຜູ້ຕ້ອງການໃຊ້ ກໍ່ຍັງສາມາດຮຽນຮູ້ຈາກແຜນທີ່ສະບັບໃໝ່ໄດ້ ເພື່ອປະໂຫຍດໃນການສຶກສາ ປະເດັນສຳຄັນທີ່ຕ້ອງການຫລາຍທີ່ສຸດ ກ່ຽວກັບຂໍ້ມູນດິນທີ່ມີຄຸນນະພາບ ໄດ້ແກ່ການຄຸ້ມຄອງຄຸນນະພາບນ້ຳ, ການຈັດການປ່າຕົ້ນນ້ຳ (ດິນນາທາມ) ແລະ ການຈໍາແນກດິນ, ການຂື້ນທະບຽນດິນ, ການເຊາະເຈື່ອນ, ປ່າຜະລິດ, ມົນລະພາວະ, ການປະເມີນ ແລະ ປົກປັກຮັກສາຊີວະນາໆພັນ.
ພ້ອມດຽວກັນນັ້ນ, ແຜນທີ່ດິນແມ່ນນຳໃຊ້ຫຼາຍທີ່ສຸດ ສຳລັບວຽກງານປະມວນຜົນທີ່ດິນ ແລະ ການວາງ ແຜນເຊີງພູມມີສາດ, ແຜນທີ່ນີ້ຈະຖືກນຳໃຊ້ໂດຍກົມຄຸ້ມຄອງ ແລະ ພັດທະນາທີ່ດິນກະສິກຳ. ສຳລັບການຄິດໄລ່ ປະມວນຜົນຄວາມເໜາະສົມ ແລະ ພັນທະພາບຂອງພືດ ໃນມື້ນີ້ ແລະ ໃນອານາຄົດ. ຂໍ້ມູນດັ່ງກ່າວນີ້ ແມ່ນຈະ ໄດ້ຕີພິມເຜີຍແຜ່ນຳໃຊ້ ຜ່ານທາງອອນລາຍ ໃນລະບົບຄຸ້ມຄອງຈັດການຂໍ້ມູນຊັບພະຍາກອນດິນ (LRIMS). https://fb.watch/8MBOFjOV0Q/
