ພາກລັດ, ຜູ້ປະກອບການ ແລະ ຊາວກະສິກອນ ຮ່ວມກັນປຶກສາຫາລືກ່ຽວກັບ ການນຳໃຊ້ມາດຕະຖານກະສິກຳທີ່ດີ ເພື່ອຄຸ້ມຄອງການປູກກ້ວຍເປັນສິນຄ້າ ຢູ່ 8 ແຂວງພາກເໜືອ
ເພື່ອຊ່ວຍໃຫ້ຜູ້ປະກອບການແລະຊາວກະສິກອນໄດ້ເຂົ້າໃຈເຖິງການນຳໃຊ້ມາດຕະຖານກະສິກຳທີ່ດີ (GAP) ໃນການຜະລິດກ້ວຍເປັນສິນຄ້າ, ກົມປູກຝັງກະຊວງກະສິກຳແລະປ່າໄມ້ຮ່ວມກັບພະແນກກະສິກຳແລະປ່າໄມ້ແຂວງອຸດົມໄຊຈຶ່ງໄດ້ຈັດກອງປະຊຸມປຶກສາຫາລືລະຫວ່າງ ພາກລັດ, ຜູ້ປະກອບການແລະຊາວກະສິກອນຂຶ້ນ, ທີ່ພະແນກກະສິກຳແລະປ່າໄມ້ແຂວງອຸດົມໄຊໂດຍການເປັນປະທານຂອງ ທ່ານປອ ພວງປຣະຣິສັກປຣະວົງວຽງຄຳຮອງລັດຖະມົນຕີກະຊວງກະສິກຳແລະປ່າໄມ້, ທ່ານເພັດສາຄອນຫຼວງອາໄພເຈົ້າແຂວງອຸດົມໄຊພ້ອມດ້ວຍພະແນກກະສິກຳແລະປ່າໄມ້, ຜູ້ປະກອບການແລະຊາວກະສິກອນຈາກ 8 ແຂວງເຂົ້າຮ່ວມ.
ຈຸດປະສົງໃນການຈັດກອງປະຊຸມຄັ້ງນີ້ເພື່ອປຶກສາຫາລື ແລະແລກປ່ຽນບົດຮຽນຮ່ວມກັນເພື່ອຊອກຫາວິທີແກ້ໄຂບັນຫາຜົນກະທົບຈາກການຜະລິດໝາກກ້ວຍເປັນສິນຄ້າເພື່ອສົ່ງອອກ ໃຫ້ໄດ້ຕາມມາດຕະຖານກະສິກໍາທີ່ດີ ແລະສອດຄ່ອງຕາມຂໍ້ກໍານົດ ເງື່ອນໄຂດ້ານສຸຂະນາໄມພືດຂອງປະເທດຄູ່ຄ້າ.
ເພື່ອແກ້ໄຂບັນຫາດັ່ງກ່າວກະຊວງກະສິກຳແລະປ່າໄມ້ສປປລາວແລະກະຊວງກະສິກຳສປຈີນກໍໄດ້ປຶກສາຫາລືກັນໃນການຈັດລະບຽບການຜະລິດກະສິກຳສະອາດຕົ້ນຕໍແມ່ນບັນຫາການປູກກ້ວຍສະອາດຕາມມາດຕະຖານ GAP ເພື່ອສົ່ງອອກໄປຈີນ, ຄຽງຄູ່ກັນນັ້ນ, ລັດຖະບານ ກໍໄດ້ມີຄຳເຫັນຊີ້ນຳໃຫ້ກະຊວງກະສິກຳແລະປ່າໄມ້ໂດຍສະເພາະແມ່ນກົມປູກຝັງໃນນາມກົມມະຫາພາກຈັດກອງປະຊຸມນີ້ເພື່ອວາງມາດຕະການແລະຊອກຫາທາງອອກໃນການຄຸ້ມຄອງສວນກ້ວຍທີ່ກຳລັງເຮັດການຜະລິດ, ບັນດາສວນກ້ວຍທີ່ຈະໝົດສັນຍາການປູກແລ້ວ ໃຫ້ຫັນໄປສູ່ການຜະລິດຕາມມາດຕະຖານສຸຂານາໄມທີ່ຈະສາມາດປະກອບສ່ວນສ້າງລາຍຮັບໃຫ້ແກ່ຊາວກະສິກອນ, ຜູ້ປະກອບການກໍຄືປະກອບສ່ວນໃນການແກ້ໄຂຄວາມທຸກຍາກຂອງປະຊາຊົນໃນໄລຍະຍາວ.
ນະຄອນຫຼວງວຽງຈັນ, ວັນທີ 02 ຕຸລາ 2017.
ໂດຍ : ເຂັມມະໄລ ສົນດາວັນ.
ກວດແກ້ :ທ່ານ ນ. ປ້ອມ ພັນທະວົງ
